لالویادو طویل عرصے کے بعد بہار پہنچے

راشٹریہ جنتا دل (آر جے ڈی) کے صدر لالو پرساد یادو طویل عرصے کے بعد آج بہار پہنچے۔ مسٹر لالو یادو کے ساتھ ان کی اہلیہ و سابق وزیر اعلیٰ رابڑی دیوی اور بڑی بیٹی و راجیہ سبھا رکن پارلیمنٹ میسا بھارتی کے ہمراہ بہار پہنچے۔ قانون ساز اسمبلی میں قائد حزب اختلاف تیجسوی پرساد یادو، ان کے بڑے بھائی اور ایم ایل اے تیج پرتاپ یادو اور پارٹی کے ریاستی صدر جگدانند سنگھ کے ساتھ آر جے ڈی کے سینئر لیڈران اور کارکنان ان کے استقبال کے لیے ایئرپورٹ پر موجود تھے۔

آر جے ڈی صدر اپنے قافلے کے ساتھ ہوائی اڈے سے سیدھے سابق وزیر اعلیٰ رابڑی دیوی کی سرکاری رہائش گاہ 10 سرکلر روڈ کے لیے روانہ ہوئے۔ 10 سرکلر روڈ پر واقع سرکاری رہائش گاہ کا مرکزی دروازہ آج آر جے ڈی صدر کے حامیوں کے لیے کھول دیا گیا۔

رہائش گاہ پر سخت حفاظتی انتظامات کے درمیان مسٹر لالو یادو پارٹی کارکنوں سے کچھ دیر ملاقات کے بعد آرام کرنے چلے گئے۔ اس کے بعد پارٹی کے حامیوں کو آہستہ آہستہ احاطے سے نکال دیا گیا۔