چارہ گھوٹالہ: لالو یادو چوتھے معاملہ میں بھی مجرم قرار

بہار کے سابق وزیر اعلیٰ اور آر جے ڈی سربراہ لالو پرساد یادو سے وابستہ چارہ گھوٹالہ کے دمکا کیس میں عدالت نے فیصلہ سنا دیا ہے۔ رانچی کی خصوصی سی بی آئی عدالت نے لالو پرساد یادو سمیت 19 ملزمان کو مجرم قرار دے دیا ہے جبکہ بہار کے سابق وزیر اعلیٰ جگن ناتھ مشرا سمیت 12 ملزمان کو بری کر دیا ہے۔

میڈیا رپورٹوں کے مطابق لالو یادو کو عدالت نے پیش ہونے کے لئے کہا تھا لیکن ان کے عدالت میں پہنچنے سے پہلے ہی ان کے خلاف فیصلہ سنا دیا گیا، حالانکہ ابھی سزا کا اعلان نہیں ہوا ہے۔

سی بی آئی کے وکیل نے کہا ’’دمکا کیس میں 12 لوگوں کو رہا کیا گیا ہے جبکہ 19 ملزام کو مجرم ٹھہرایا گیا ہے۔ حالانکہ سزا کا اعلان ابھی نہیں ہوا ہے۔ عدالت میں 21، 22 اور 23 مارچ کو سزا پر بحث ہوگی اور ہر دن 6-6 مجرمان کو سزا سنائی جائے گی۔ ‘‘ تصور کیا جا رہا ہے کہ 22 مارچ کو سزا کا اعلان ہو سکتا ہے۔

قبل ازیں لالو یادو کو چارہ گھوٹالے سے وابستہ 3 دیگر معاملات میں مجرم ٹھہرایا جا چکا ہے اور وہ رانچی کی برسا منڈا جیل میں بند ہیں۔ جس چوتھے معامل میں لالو یادو کو مجرم قرار دیا گیا ہے وہ دمکا خزانہ سے وابستہ ہے اور اس میں بہار کے سابق وزیر اعلیٰ اور آر جے ڈی سربراہ لالو پرساد اور سابق وزیر اعلیٰ جگن ناتھ مشرا سمیت 31 لوگوں کو ملزم بنایا گیا تھا۔ اس معاملہ میں میں تین کروڑ، تیرہ لاکھ روپے کا غبن کیا گیا تھا۔