’لکھیم پور کھیری سانحہ کے مجرم وزیر کو برخاست کیا جائے‘ حزب اختلاف کا پارلیمنٹ میں احتجاج

نئی دہلی: لکھیم پور کھیری سانحہ کے کلیدی ملزم آشیش مشرا کے والد مرکزی وزیر مملکت برائے داخلہ اجے مشرا ٹینی کو برخاست کرنے کے مطالبہ پر حزب اختلاف پارلیمنٹ میں لگاتار سراپا احتجاج جاری ہے۔ کانگریس کے رکن پارلیمنٹ راہل گاندھی نے مرکزی وزیر مملکت اجے مشرا ٹینی پر جمعرات کے روز ایک مرتبہ پھر حملہ بولا۔ راہل گاندھی نے کہا کہ اس معاملہ میں وزیر ملوث ہے، وہ ایک مجرم ہے اور انہیں عہدہ وزارت سے برخاست کر دینا چاہئے یا پھر انہیں خود ہی استعفیٰ سونپ دینا چاہیے۔

حزب اختلاف کی جماعتوں کے احتجاج کی وجہ سے ہنگامہ اور شور شرابے کے درمیان راہل گاندھی نے لوک سبھا میں کہا، ’’وزیر کو استعفی دے دینا چاہئے۔ وہ ایک مجرم ہیں۔ قبل ازیں، حزب اختلاف کے ارکان پارلیمنٹ نے ایوان میں اس معاملہ پر تحریک التوا کے نوٹس پیش کئے۔ دریں اثنا، راجیہ سبھا کے معطل ممبران پارلیمنٹ کے احاطے میں گاندھی مجسمہ پر اپنا احتجاج جاری رکھا اور لکھیم پور کھیری واقعہ پر وزیر داخلہ اجے مشرا ٹینی کے استعفیٰ کا مطالبہ کیا۔