لکھیم پور کھیری: درخت سے لٹکی ملی دونوں دلت بہنوں کی آخری رسومات ادا، انتظامیہ نے متاثرہ کنبہ سے کیے 5 وعدے

اتر پردیش کے لکھیم پور کھیری ضلع واقع نگھاسن تھانہ علاقہ کے تمولین پروا گاؤں کے باہر بدھ کے روز گنے کے کھیت میں درخت سے لٹکی ملی دونوں دلت بہنوں کی آج پولیس کی سخت سیکورٹی میں آخری رسومات ادا کر دی گئی۔ کل شام عصمت دری اور قتل کے بعد دونوں کی لاش کو درخت سے لٹکا دیا گیا تھا۔ پولیس نے اس واردات کے الزام میں 6 لڑکوں کو گرفتار کیا ہے۔

اس سے قبل جمعرات کو متاثرہ کنبہ نے دونوں نابالغ بچیوں کی آخری رسومات ادا کرنے سے منع کر دیا تھا۔ بعد ازاں پولیس اور انتظامیہ کے اعلیٰ افسران نے انھیں کافی سمجھانے کی کوشش کی۔ ملی جانکاری کے مطابق انتظامیہ نے کنبہ سے پانچ وعدے کیے جس کے بعد انھوں نے دونوں لڑکیوں کی آخری رسومات ادا کی۔ کنبہ نے روایت کے مطابق دونوں بہنوں کی لاشوں کی تدفین کی ہے۔

ہندی نیوز پورٹل ’آج تک‘ کی ایک رپورٹ کے مطابق انتظامیہ نے مہلوکین کے والدین سے جو پانچ وعدے کیے ہیں ان میں پہلا ہے ایس سی/ایس ٹی ایکٹ کے تحت دونوں مردہ لڑکیوں کی ماں کو 8-8 لاکھ روپے کی مالی امداد کی جائے گی، جس کی پہلی قسط 16 ستمبر کو اس کے بینک اکاؤنٹ میں پہنچ جائے گی۔ دوسرا، رانی لکشمی بائی یوجنا کے تحت ملنے والی رقم معاملے کی جانچ ختم ہونے کے فوراً بعد دے دی جائے گی۔

اس کے علاوہ انتظامیہ نے وعدہ کیا ہے کہ پردھان منتری آواس یوجنا کے تحت متاثرہ کنبہ کو گھر دیا جائے گا۔ اس کے لیے بلاک کے ذریعہ جلد ہی کارروائی کی جائے گی۔ ملازمت اور زیادہ سے زیادہ معاشی مدد پہنچانے کے لیے انتظامیہ کو تجویز بھیجی جائے گی۔ پانچواں وعدہ جو انتظامیہ نے کیا ہے وہ یہ ہے کہ واردات میں شامل ملزمین کو جلد از جلد پھانسی کے پھندے تک پہنچانے کے لیے فاسٹ ٹریک کورٹ میں پیروی کی جائے گی۔