کویت آتشزدگی: جان بحق ہونے والوں میں 14 کا کیرالہ سے تعلق، میتیں لانے خلیجی ملک جائیں گی وزیر وینا جارج
کیرالہ کی وزیر صحت وینا جارج کویت میں آتشزدگی میں جان بحق ہونے والوں کی میتیں واپس لانے کے لیے آج کویتی کے المنقف کے لئے روانہ ہوں گی
![<div class="paragraphs"><p>آئی اے این ایس</p></div>](https://media.assettype.com/qaumiawaz%2F2024-06%2Fab23790c-05f5-449b-9ed7-97f9bc6d2d33%2Fkuwat_fire.jpg?rect=0%2C50%2C4000%2C2250&auto=format%2Ccompress&fmt=webp)
آئی اے این ایس
ترواننت پورم: کیرالہ کی وزیر صحت وینا جارج کویت میں آتشزدگی میں جان بحق ہونے والوں کی میتیں واپس لانے کے لیے آج کویتی کے المنقف کے لئے روانہ ہوں گی۔ اس آگ میں جان بحق ہونے والوں میں 40 ہندوستانی بھی شامل ہیں۔ یہ فیصلہ وزیر اعلیٰ پنارائی وجین کی صدارت میں منعقدہ اجلاس کے دوران لیا گیا۔ سی ایم وجین حکومت نے ہلاک شدگان کے لواحقین کو فی کس 5 لاکھ روپے اور زخمیوں کو ایک ایک لاکھ روپے کا معاوضہ دینے کا فیصلہ کیا ہے۔
خیال رہے کہ کویت کے جنوبی شہر المنقف میں ایک عمارت میں زبردست آگ لگنے سے جان بحق ہونے والے کیرالہ کے 14 لوگوں میں سے 13 کی شناخت ہو گئی ہے۔ عمارت میں آگ لگنے سے کیرالہ کی ایک کمپنی کے 49 ملازمین کی موت ہوئی ہے۔
کویتی ذرائع کے مطابق ہلاک شدگان کی تعداد میں مزید اضافہ ہو سکتا ہے۔ وہیں عمارت میں رہنے والے تقریباً 18 ملازمین اس حادثے میں بال بال بچ گئے، وہ صبح تقریباً 4 بجے صبح کی ڈیوٹی کے لیے عمارت سے نکل گئے تھے۔
نئے مقرر کردہ مرکزی وزیر مملکت جارج کورین نے کہا کہ ریاستی وزیر کیرتی وردھن سنگھ ہندوستانی سفارت خانے کے ساتھ رابطہ قائم کرنے کے لیے کویت روانہ ہو گئے ہیں تاکہ ہلاک ہونے والوں کی لاشیں واپس لائی جا سکیں۔ انہوں نے کہا کہ تمام ہندوستانیوں کی لاشوں کو واپس لانے کے تمام انتظامات کئے جائیں گے۔
واضح رہے کہ کویت میں لگنے والی اس خوفناک آگ میں عمارت مکمل طور پر تباہ ہو گئی ہے۔ اس عمارت کے بارے میں بتایا جا رہا ہے کہ اس میں کارکن رہتے تھے جن میں زیادہ تر ہندوستانی تھے۔ یہ آگ بدھ کی صبح لگی۔ وہاں کی حکومت نے اس کے لیے مالک کو ذمہ دار ٹھہرایا ہے۔ آتشزدگی کا یہ بڑا واقعہ المنقف علاقہ میں پیش آیا جو جنوبی کویت میں واقع ہے۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔