کرناٹک: کماراسوامی کو اعتماد کا ووٹ حاصل

کرناٹک کے وزیر اعلیٰ کماراسوامی نے اسمبلی میں فلور ٹیسٹ میں کامیابی حاصل کرتے ہوئے اعتماد کا ووٹ حاصل کر لیا۔ کماراسوامی کے حق میں 117 ارکان اسمبلی نے ووٹ کیا جبکہ اکثریت 112 پر ہی حاصل ہو جاتی۔ فلور ٹیسٹ سے قبل ہی بی جے پی نے ایوان سے واک آؤٹ کر دیا تھا۔

اعتماد کا ووٹ حاصل کرنے کے بعد کماراسوامی نے کہا کہ وہ اب پوری سرگرمی کے ساتھ کام کریں گے۔ انہوں نے کہا، ’’میں ایکشن اب شروع ہوگا۔ میں اپنے کئے ہوئے تمام وعدوں کو پورا کروں گا۔‘‘ بی ایس یدی یورپا کے تعلق سے گفتگو کرتے ہوئے کہا، ’’بی ایس یدی یورپا نے جس انداز میں بات کی وہ افسوس ناک ہے۔ ان کی باتوں سے مجھے فرق نہیں پڑتا۔‘‘

وزیر اعلیٰ کماراسوامی نے بی جے پی کی طرف سے کانگریس-جے ڈی ایس اتحاد پر اٹھائے جا رہے سوال کا ایوان میں جواب دیا۔ انہوں نے کہا، ’’2004 میں ہم سہ رخی اسمبلی کے گواہ بن چکے ہیں۔ اس وقت مسلسل دو اتحاد ہوئے تھے۔ ریاست کے لئے اتحاد کوئی نئی چیز نہیں ہے۔ مجھے یہ بات سمجھ نہیں آ رہی کہ آخر بی جے پی کس بنیاد پر مینڈیٹ ملنے کا دعویٰ کر رہی ہے۔‘‘

وزیر اعلیٰ ایچ ڈی کماراسوامی نے کہا، ’’2004 میں بی جے پی نے میری شبیہ منفی بنا دی۔ اب بی جے پی سوال پوچھ رہی ہے کہ کانگریس نے جے ڈی ایس کے ساتھ اتحاد کیوں کیا؟ میں نے کانگریس کے ساتھ اتحاد اس لئے کیا کیوں کہ مجھے ماضی میں اپنے والد کے کیرئر پر لگے داغ کو مٹانا ہے۔‘‘

واک آؤٹ کرتے وقت یدی یورپا نے کہا کہ اگر کماراسوامی نے کسانوں کا قرض معاف نہ کیا تو بی جے پی 28 مئی کو بند بلائے گی۔

کرناٹک کے وزیر اعلیٰ ایچ ڈی کماراسوامی نے اکثریت ثابت کرنے کے مقصد سے اسمبلی میں تحریک اعتماد پیش کر دیا ہے۔

ادھر اسمبلی میں بولتے ہوئے کانگریس کے رکن اسمبلی ڈی کے شیوکمار نے کہا، ’’اسپیکر رمیش کمار کے بلامقابلہ منتخب ہونے سے ہم خوش ہیں۔ ایسا ہونے سے اسپیکر کے عہدے کا وقاب بڑھا ہے۔‘‘ وہیں سابق وزیر اعلیٰ اور کانگریس کے رہنما سدا رمیا نے کہا کہ جمہوری نظام میں اسپیکر کا کردار اہم ہوتا ہے۔

کانگریس کے رمیش کمار بلا مقابلہ کرناٹک اسمبلی کے اسپیکر منتخب کر لئے گئے ہیں۔ اسمبلی میں اسپیکر کے چناؤ سے عین قبل بی جے پی نے اپنے امیدوار سریش کمار کا نام واپس لے لیا۔ بی جے پی نے اپنے امیدوار کا نام واپس لیتے ہوئے کہا، ’’ہم اسپیکر عہدے کا وقار برقرار کھنے کے لئے اتفاق رائے چاہتے ہیں، لہاذا ہم اپنے امیدوار کا نام واپس لے رہے ہیں۔‘‘

کرناٹک اسمبلی میں آج وزیر اعلیٰ ایچ ڈی کماراسوامی کا پہلا امتحان ہے جہاں انہیں فلور ٹیسٹ کا سامنا کر کے اپنی اکثریت ثابت کرنی ہوگی۔ اسمبلی کی کارروائی دوپہر 12.15 بجے شروع ہوگی اور دوپہر 2 بجے اسمبلی میں فلور ٹیسٹ ہوگا۔ فلور ٹیسٹ سے قبل اسپیکر کا انتخاب ہو گا۔ اسپیکر عہدے کے لئے کانگریس کے رمیش کمار اور بی جے پی کی طرف سے سریش کمار کو امیدوار بنایا گیا۔

واضح رہے کہ کماراسوامی نے 23 مئی کو کرناٹک کے وزیر اعلیٰ عہدے کا حلف لیا تھا۔

فلور ٹیسٹ سے قبل کماراسوامی نے اپنے بیان میں کہا کہ وہ اعتماد کا ووٹ آسانی سے حاصل کر لیں گے۔ میڈیا سے بات کرتے ہوئے ایچ ڈی کماراسوامی نے کہا، ’’مجھے کوئی ٹنشن نہیں ہے۔ میں اکثریت ثابت کرنے جا رہا ہوں، جیت ہماری ہوگی۔‘‘

کرناٹک اسمبلی میں کانگریس کے 78، جے ڈی ایس کے 36 اور بی ایس پی کا ایک رکن اسمبلی ہے۔ اتحاد کا دعوی ہے کہ انہیں کے پی جے پی کے ایک رکن اسمبلی اور ایک آزاد رکن اسمبلی کی بھی حمایت حاصل ہے۔ ادھر بی جے پی کے ارکان اسمبلی کی تعداد 104 ہے۔