دریا کے نیچے سرنگ سے گزری کولکاتا میٹرو! ملک کی سب سے پرانی میٹرو سروس نے رقم کی تاریخ

کولکاتا: ملک کی سب سے قدیم میٹرو سروس ’کولکاتا میٹرو‘ نے ہگلی ندی کے نیچے سفر طے کر کے تاریخ رقم کر دی ہے۔ یہ پہلا موقع تھا جب ہندوستان میں کسی میٹرو نے دریا کے نیچے سفر طے کیا۔ کولکاتا میٹرو کے جنرل منیجر پی ادے کمار ریڈی نے اس آزمائش کو کولکاتا شہر کے لیے ایک تاریخی لمحہ قرار دیا۔

ادے کمار ریڈی نے کہا ’’یہ پہلا موقع ہے جب کوئی ٹرین دریائے ہوگلی کے نیچے سے گزری ہے۔ 33 میٹر کی گہرائی میں واقع یہ ملک کا سب سے گہرا اسٹیشن بھی ہے۔ ہندوستان میں پہلی بار ایسا ہوا ہے۔ یہ کولکاتا شہر کے لیے ایک تاریخی لمحہ ہے۔‘‘ انہوں نے کہا کہ ہاوڑہ میدان سے ایسپلانیڈ تک ٹرائل رن اگلے 7 ماہ تک جاری رہے گا۔ اس کے بعد اسے عوام کے لیے باقاعدہ شروع کیا جائے گا۔

ہاوڑہ-ایسپلانیڈ سیکشن پر تجارتی خدمات بھی اسی سال شروع ہونے کی توقع ہے۔ رپورٹ کے مطابق میٹرو نے ہگلی ندی کے نیچے 520 میٹر کا فاصلہ 45 سیکنڈ میں طے کیا۔ دریا کے نیچے یہ سرنگ سطح آب سے 32 میٹر نیچے ہے۔ یہ سیکشن ایسٹ ویسٹ میٹرو کوریڈور کا حصہ ہے جو کولکاتا کے آئی ٹی ہب سالٹ لیک میں ہاوڑہ میدان اور سیکٹر پانچ کو جوڑتا ہے۔ یہ پروجیکٹ کولکاتا میٹرو کی نارتھ ساؤتھ لائن کے ایسپلانیڈ اسٹیشن کو ہاوڑہ اور سیالدہ کے انڈین ریلوے اسٹیشنوں سے جوڑے گا۔

یہ پیش رفت کولکاتا میٹرو کے لیے ایک اور سنگ میل ہے کیونکہ یہ ملک کی پہلی میٹرو ریلوے بھی تھی، کولکاتا میں جس کا 1984 میں آغاز ہوا تھا۔ اس کے بعد راجدھانی دہلی میں 2002 میں میٹرو خدمات شروع کی گئیں۔