کشتواڑ بادل پھٹنے کا واقعہ: اب تک سات افراد کی ہلاکت کی تصدیق، ایک درجن زخمی، قریب دو درجن لاپتہ

جموں: جموں و کشمیر کے ضلع کشتواڑ کے ہونزر دچھن علاقے میں بادل پھٹنے کے واقعے کے بعد آنے والے سیلابی ریلوں کے نیتجے میں سات افراد ہلاک، ایک درجن زخمی جبکہ زائد از دو درجن لاپتہ ہوئے ہیں۔ واقعہ پیش آنے کے ساتھ ہی پولیس، فوج، این ڈی آر ایف، سول انتظامیہ اور مقامی لوگ بچاؤ کارروائی میں لگے ہوئے ہیں تاہم ناساز موسمی حالات سے ان کے کام میں رکاوٹیں پیدا ہو رہی ہیں۔

سرکاری ذرائع نے بتایا کہ ضلع کشتواڑ کے پہاڑی علاقہ ہونزر دچھن میں بدھ کی علی الصبح بادل پھٹنے سے سیلابی صورتحال پیدا ہوئی اور سیلابی ریلوں نے کئی افراد کو اپنے ساتھ بہا لیا اور زائد نصف درجن مکانوں کو نقصان پہنچایا۔ انہوں نے کہا کہ غرقآب ہونے والوں میں سے اب تک سات افراد کی لاشیں برآمد کی گئی ہیں جبکہ زائد از دو درجن افراد ابھی لاپتہ ہیں جن کی بڑے پیمانے پر تلاش جاری ہے۔

جموں زون پولیس کے انسپکٹر جنرل نے اپنے آفیشل ٹویٹر ہینڈل پر ’کشتواڑ فلیش فلڈس‘ کے بارے میں اپنے تازہ اپ ڈیٹ میں کہا: ’مزید پانچ زخمیوں کو بچایا گیا، اب تک کل 17 افراد بچائے گئے جن میں سے پانچ شدید زخمی ہیں۔ اور اب تک سات لاشوں کو بر آمد کیا گیا ہے بچاؤ آپریشن ہنوز جاری ہے‘۔

قبل ازیں کشتواڑ پولیس نے اپنے ٹویٹر ہینڈل پر سیلابی ریلوں کے بارے میں اپ ڈیٹ فراہم کرتے ہوئے کہا تھا: 'کشتواڑ کے ہونزر دچھن علاقے میں بادل پھٹنے سے چھ مکان اور ایک راشن ڈیپو کو نقصان پہنچا ہے، 25 سے 26 مقامی افراد لاپتہ ہیں، اب تک پانچ لاشوں کو برآمد کیا گیا ہے اور بارہ افراد زخمی ہوئے ہیں۔ بچاؤ آپریشن جاری ہے'۔

دریں اثنا وزیر اعظم کے دفتر میں وزیر مملکت ڈاکٹر جیتندر سنگھ نے کہا ہے کہ کشتواڑ کی اس صورتحال کی باریکی سے نگرانی کی جا رہی ہے۔

انہوں نے کہا کہ فضائی فورس حکام کے ساتھ بھی رابطہ کیا گیا ہے تاکہ ضرورت پڑنے پر ان کی مدد بھی حاصل کی جا سکے۔

جموں و کشمیر کے لیفٹیننٹ گورنر منوج سنہا نے کشتواڑ میں پیش آئے اس سانحے پر اظہار دکھ کرتے ہوئے غمزدہ خاندانوں کے ساتھ یکجہتی کا اظہار کیا۔

اس ضمن میں انہوں نے اپنے ایک ٹویٹ میں کہا: ’کشتواڑ کے دچھن علاقے میں بادل پھٹنے سے آنے والے فلیش فلڈس سے قیمتی جانوں کے نقصان پر افسردہ ہوں غمزدہ خاندانوں کے ساتھ اظہار یکجہتی کرتا ہوں‘۔

ان کا اپنے دوسرے ٹویٹ میں کہنا تھا: ’میں نے ضلع انتظامیہ اور حکام سے بات کی۔ فوج اور ایس آر ڈی ایف کی ٹیم لاپتہ افراد کی بازیابی کے لئے جنگی بنیادوں پر کام کر ری ہے اور میں خود لگاتار صورتحال کی نگرانی کر رہا ہوں‘۔

نیشنل کانفرنس کے نائب صدر اور سابق وزیر اعلیٰ عمر عبداللہ نے اس واقعے میں لاپتہ ہونے والے افراد کی صحیح سلامت بازیابی کی دعا کرتے ہوئے اپنے ایک ٹویٹ میں کہا: ’کشتواڑ کے بالائی علاقے میں بادل پھٹنے کی انتہائی دلدوز خبر آ رہی ہے۔ دعا کرتا ہوں کہ لاپتہ افراد صحیح و سلامت باز یاب ہوں اور جو از جان ہوئے ان کے ارواح کو سکون میسر ہو‘۔

پی ڈی پی صدر اور سابق وزیر اعلیٰ محبوبہ مفتی نے کشتواڑ میں پیش آئے اس سانحہ پر اظہار افسوس کرتے ہوئے اپنے ایک ٹویٹ میں کہا ہے: 'کشتواڑ میں بادل پھٹنے کا واقعہ پیش آنے سے مجھے رنجیدگی ہوئی اس سانحہ میں جن کے عزیز جاں بحق ہوئے ان کے ساتھ اظہار ہمدردی اور لاپتہ افراد کی بازیابی کے لئے دعا گو ہوں'۔