مودی حکومت نے جنگ زدہ اسرائیل میں ہندوستانی کارکنوں کی بھرتی میں مدد کی: ملکارجن کھڑگے

نئی دہلی: کانگریس کے صدر ملکارجن کھڑگے نے وزیراعظم نریندر مودی کی حکومت پر الزام لگایا ہے کہ وہ اسرائیل میں تقریباً 15000 ہندوستانی کارکنوں کی بھرتی میں مدد کر رہی ہے، جو حالیہ جنگ کی زد میں ہے۔ انہوں نے کہا کہ ہریانہ کے نوجوان کل ریاست میں ہونے جا رہے اسمبلی انتخابات میں بی جے پی کو سخت سبق سکھائیں گے۔

سوشل میڈیا پلیٹ فارم ایکس پر پوسٹ کرتے ہوئے کانگریس صدر ملکارجن کھڑگے نے لکھا، ’’مغربی ایشیا میں جنگ کے درمیان مودی حکومت کی نیشنل اسکل ڈیولپمنٹ کوآپریشن ایجنسی اسرائیل میں تقریباً 15000 ہندوستانی کارکنوں کو بھرتی کرنے میں مدد کر رہی ہے۔ اس سے پہلے بہت سے ہندوستانی نوجوانوں کو مشتبہ ایجنٹوں نے روس-یوکرین جنگ میں جانے کا جھانسہ دیا تھا۔ بہت سے لوگ اپنی جانیں بھی گنوا چکے ہیں۔‘‘

ملکارجن کھڑگے نے کہا، ’’پڑھے لکھے نوجوان جنگ زدہ علاقوں میں مبینہ طور پر زیادہ تنخواہوں پر خدمات انجام دینے کے لیے اپنی جان خطرے میں ڈالنے کے لیے تیار ہیں۔ اس سے ظاہر ہوتا ہے کہ وزیر اعظم نریندر مودی کے نوکریوں کے بڑے بڑے دعوے اپنی ناکامیوں کو چھپانے کے لیے جھوٹے بیانات کے سوا کچھ نہیں ہیں۔‘‘

انہوں نے دعویٰ کیا کہ یہ مودی حکومت کی نوجوان مخالف پالیسیوں سے پیدا ہونے والے بے روزگاری کے بحران کے بارے میں بہت کچھ بتاتا ہے۔ انہوں نے دعویٰ کیا کہ ہریانہ کے نوجوان جو ان تنازعات والے علاقوں میں نوکریوں کی تلاش پر مجبور ہیں، کل ریاستی انتخابات میں بی جے پی کو سخت سبق سکھائیں گے۔