مفت خوری والے بیان پر کیجریوال نے گجرات بی جے پی صدر پر کسا طنز

عآپ کنوینر اور دہلی کے وزیر اعلیٰ اروند کیجریوال نے گجرات بی جے پی صدر کے اس بیان پر طنز کسا ہے جس میں انھوں نے عآپ کو لوگوں کو مفت سہولیات دینے سے متعلق تنقید کا نشانہ بنایا تھا۔ گجرات بی جے پی صدر سی آر پاٹل نے کیجریوال اور عآپ کو بالواسطہ طور پر ہدف تنقید بنایا تھا اور لوگوں سے کہا تھا کہ سیاسی پارٹیوں کے ذریعہ دی جانے والی مفت خدمات کے بہکاوے میں نہ آئیں۔ گجرات بی جے پی سربراہ نے جمعرات کو سورت میں یہ بیان دیا تھا۔

سورت میں جنوبی گجرات میڈیکل ایجوکیشن اینڈ ریسرچ انسٹی ٹیوٹ کا افتتاح کرتے ہوئے گجرات بی جے پی صدر نے لوگوں کو مفت خدمات سے متاثر نہ ہونے کے تئیں آگاہ کیا تھا۔ انھوں نے کہا تھا کہ ’’مفت خدمات معیشت کے لیے اچھی نہیں ہیں اور یہ ریاست کو برباد کر سکتی ہیں۔‘‘ اس بیان پر رد عمل ظاہر کرتے ہوئے عآپ لیڈر اروند کیجریوال نے ٹوئٹ کیا کہ ’’پاٹل صاحب، آپ کے وزراء کو مفت بجلی ملتی ہے وہ ٹھیک ہے؟ عوام کو میں مفت بجلی دیتا ہوں تو آپ کو کتنی تکلیف ہے۔‘‘

اروند کیجریوال نے ایک دیگر ٹوئٹ میں یہ بھی لکھا کہ ’’گجرات حکومت بہت بدعنوان ہے، اگر آپ بدعنوانی کو مٹا سکتے ہیں، جیسا کہ عآپ حکومت نے پنجاب اور دہلی میں کیا، تو حکومت بڑی مقدار میں پیسے بچائے گی، جس کا استعمال شہریوں کو مفت بجلی دینے کے لیے کیا جا سکتا ہے۔‘‘

واضح رہے کہ گجرات میں پیر جمانے کی کوشش کر رہی عآپ لگاتار بی جے پی کے نشانے پر رہی ہے۔ سورت میونسپل کارپوریشن الیکشن میں کیجریوال کی پارٹی نے 27 سیٹیں جیتی تھیں۔ پاٹل نے تب عآپ کی کامیابی کو بلیک اسپاٹ بتایا تھا۔ حال ہی میں عآپ اور بھارتیہ ٹرائبل پارٹی نے مل کر اسمبلی انتخاب لڑنے کا فیصلہ کیا ہے۔ ذرائع نے کہا کہ حالانکہ عآپ کے پاس مضبوط نیٹورک نہیں ہے، لیکن بی جے پی اسے ہلکے میں نہیں لے رہی ہے اور برسراقتدار پارٹی کے لیے اصل چیلنج بننے سے پہلے اس نے اس کی شبیہ خراب کرنے کا فیصلہ کیا ہے۔