دہلی کے باشندوں کو کیجریوال نے دیا بڑا تحفہ، 200 یونٹ تک بجلی مفت

دہلی اسمبلی انتخاب سے قبل عام آدمی پارٹی کی حکومت نے راجدھانی کے باشندوں کو بڑی راحت دی ہے۔ کیجریوال حکومت نے 200 یونٹ تک بجلی خرچ کرنے والوں کو مفت بجلی دینے کا اعلان کیا ہے۔ دہلی حکومت نے اعلان کیا ہے کہ یہ چھوٹ آج یعنی یکم اگست سے ہی دی جائے گی۔

اس کے علاوہ 201 سے 400 یونٹ تک بجلی استعمال کرنے والوں کو 50 فیصد کی چھوٹ ملے گی۔ دہلی کے وزیر اعلیٰ اروند کیجریوال نے آج یہ اعلان ایک پریس کانفرنس کے دوران کیا۔ واضح رہے کہ ابھی تک 200 یونٹ تک بجلی خرچ کرنے پر 622 روپے دینے پڑتے تھے۔ اس چھوٹ سے سبسیڈی پر تقریباً 1800 کروڑ کا خرچ آئے گا۔

کیجریوال نے اس بڑے اعلان کے بعد کہا کہ دہلی میں بجلی کمپنیوں کا خسارہ 17 فیصد سے گھٹ کر 8 فیصد ہو گیا ہے۔ ساتھ ہی انھوں نے کہا کہ ’’جو لوگ دہلی میں بجلی کا 200 یونٹ تک استعمال کرتے ہیں، ان کو اپنا بجلی بل دینے کی ضرورت نہیں ہوگی۔ ان کے بجلی بل معاف ہوں گے۔ یہ اعلان اس لیے ممکن ہوا کیونکہ دہلی کے لوگوں نے ایک ایماندار حکومت کو چنا۔‘‘

اس سے قبل ڈی ای آر سی نے بدھ کو 20-2019 کے لیے نئی بجلی کی شرحوں کا اعلان کیا تھا۔ اس کے تحت میٹر کے کرایہ کو کم اور فی یونٹ بجلی کی شرحوں کو بڑھایا گیا ہے۔ اس سے سبھی گھریلو بجلی صارفین کے بل میں 750 روپے تک کی بچت ہوگی۔