کشمیر کے پہلے مسلمان آئی اے ایس محمد شفیع پنڈت کا انتقال، وزیر اعظم کا اظہارِ تعزیت

سری نگر: کشمیر کے پہلے مسلمان انڈین ایڈمنسٹریٹو سروس (آئی اے ایس) افسر اور سابق جموں و کشمیر پبلک سروسز کمیشن (جے کے پی ایس سی) کے چیئرمین محمد شفیع پنڈت کا انتقال جمعرات کو دہلی کے ایک ہسپتال میں ہو گیا۔ وہ 80 برس کے تھے اور طویل عرصہ سے علیل تھے۔

خاندانی ذرائع کے مطابق، محمد شفیع پنڈت گزشتہ ایک ماہ سے دہلی کے ہسپتال میں زیر علاج تھے۔ سری نگر کے سابق مئیر، جیند متو نے 'ایکس' پر ایک پوسٹ میں کہا، ’’میرے پیارے چچا، جے کے پی ایس سی کے سابق چیئرمین اور جموں و کشمیر کے سابق ایڈیشنل چیف سکریٹری محمد شفیع پنڈت کا طویل علالت کے بعد دہلی میں انتقال ہو گیا۔ ان کی میت آج سری نگر پہنچے گی اور تجہیز و تکفین آج ہی انجام دی جائے گی۔‘‘

محمد شفیع پنڈت سال 1969 میں سول سروسز کے امتحان میں کامیابی حاصل کرنے والے کشمیر کے پہلے مسلمان تھے۔ انہوں نے اپنی ملازمت کے دوران ایک ایسا چیف سکریٹری کا کردار ادا کیا جس کی مثال جموں و کشمیر میں کبھی نہیں دیکھی گئی۔ ریٹائرمنٹ کے بعد بھی، وہ کشمیر میں مختلف سول سوسائٹی اور فلاحی کاموں میں مشغول رہے۔

ان کے انتقال پر وزیر اعظم نریندر مودی اور مختلف شعبوں سے تعلق رکھنے والی شخصیات نے گہرے رنج و غم کا اظہار کیا ہے۔ وزیر اعظم مودی نے سری نگر میں ایک عوامی ریلی سے خطاب کرتے ہوئے کہا، ’’مجھے اطلاع ملی ہے کہ کشمیر کے پہلے آئی اے ایس افسر محمد شفیع پنڈت کا انتقال ہو گیا ہے۔ وہ ریٹائرمنٹ کے بعد بھی معاشرت کی بہتری کے لیے کام کرتے رہے۔ اس مصیبت کی گھڑی میں ہماری دعائیں اور خیالات مرحوم کے خاندان کے ساتھ ہیں۔‘‘

سینئر کانگریس لیڈر جے رام رمیش نے اپنے افسوس کا اظہار کرتے ہوئے کہا، ’’میرے دیرینہ دوست محمد شفیع پنڈت کا انتقال ہوا۔ وہ 1969 بیچ کے آئی اے ایس افسر تھے اور جموں و کشمیر اور مرکز میں کلیدی عہدوں پر فائز رہے۔ ریٹائرمنٹ کے بعد انہوں نے عوامی خدمت کے لیے اپنے آپ کو وقف کیا تھا۔‘‘

جواہر لال یونیورسٹی کے سکول آف انٹرنیشنل اسٹڈیز کے ڈین اور پروفیسر امتیابھ متو نے محمد شفیع پنڈت کو ممتاز سول سرونٹ اور شریف النفس شخصیت قرار دیا۔ ضلع مجسٹریٹ کولگام اطہر عامر خان نے کہا، ’’میں گزشتہ نو برسوں سے ان کے ساتھ رابطے میں تھا۔ وہ ایک انتہائی منکسر المزاج اور سخی شخصیت کے مالک تھے۔‘‘