کشمیر: آئینی حیثیت کی بازیابی کے لئے قانونی جنگ جاری رکھیں گے، اکبر لون کا اعلان

سری نگر: نیشنل کانفرنس کے سینئر لیڈر اور رکن پارلیمان ایڈوکیٹ محمد اکبر لون نے کہا ہے کہ ہم جموں و کشمیر کی آئینی حیثیت کی بازیابی کے لئے عدالت عظمیٰ میں قانونی جنگ جاری رکھیں گے۔ انہوں نے کہا کہ جموں وکشمیر کے لوگ پرامید ہیں کہ آئین کی بالادستی قائم ہے اور ہمیں ایک دن انصاف ضرور ملے گا۔

موصوف نے ان باتوں کا اظہار یہاں منگل کے روز پارٹی کے عہدیداروں اور کارکنوں کے ساتھ ایک ملاقات کے دوران کیا۔ انہوں نے کہا کہ 'جموں و کشمیر کی خصوصی پوزیشن کی بازیابی کے لئے ہم قانونی جنگ جاری رکھیں گے۔ سابق ریاست جموں و کشمیر کے تینوں خطوں کی وحدت، شناخت، اجتماعیت اور اپنے جھنڈے اور آئین کی بازیابی کے لئے عوام اپنے ارادوں پر قائم ہے'۔

موصوف رکن پارلیمان نے کہا کہ ہمارا کیس عدالت عظمیٰ میں زیر سماعت ہے اور اس سلسلے میں کشمیری، ڈوگرہ اور لداخی عوام کو امید ہے کہ انہیں اپنے آئینی حقوق واپس مل جائیں گے اور ان کے ساتھ ضرور انصاف ہوگا۔ انہوں نے کہا کہ جموں وکشمیر کے لوگوں کو جو حقوق آئین ہند کے تحت ملے تھے وہ موجودہ سخت گیر مزکزی حکومت نے ہم سے چھین لئے ہیں۔

ایڈوکیٹ لون نے امید ظاہر کرتے ہوئے کہا کہ جو سیاسی لیڈر گھروں یا جیل خانوں میں بند ہیں ان کو بہت جلد رہا کیا جائے گا اور پارٹی کے جو لیڈران نظر بند ہیں جو دہائیوں تک رکن اسمبلی یا ایم ایل سی رہے ہیں، کی نظر بندی بھی جلد ختم کی جائے گی۔