کشمیر: کورونا گائیڈ لائنز کی خلاف ورزی کرنے والوں سے تقریباً دو لاکھ روپے جرمانہ وصول

سری نگر: جموں وکشمیر پولیس نے وادی کے مختلف علاقوں میں گزشتہ تین دنوں کے دوران کورونا گائیڈ لائنز کی خلاف ورزی کرنے والوں سے قریب دو لاکھ روپیے بطور جرمانہ وصول کیے ہیں جبکہ تین ایف آئی آر بھی درج کیے گئے ہیں۔

ایک پولیس ترجمان نے بتایا کہ پولیس نے جنوبی ضلع اننت ناگ میں جمعرات کے روز کورونا گائیڈ لائنز کی خلاف روزی کرنے والوں کے خلاف تین ایف آئی آر درج کیے اور 60 ہزار 8 سو روپیے جرمانہ بھی عائد کیا۔ انہوں نے بتایا کہ وادی میں گزشتہ تین دنوں کے دوران کورونا گائیڈ لائنز کی خلاف ورزی کرنے والوں سے ایک لاکھ اسی ہزار روپیے بطور جرمانہ وصولے گئے۔

پولس ترجمان کا کہنا تھا کہ شمالی قصبہ سوپور میں مارکیٹ چیکنگ کے دوران کورونا گائیڈ لائنز کی خلاف ورزی کرنے والے 58 افراد پر 10 ہزار 8 سو روپیہ جرمانہ عائد کیا گیا۔ قابل ذکر ہے کہ جموں کشمیر انتظامیہ نے کورونا کی اس دوسری لہر کی روک تھام کے لئے یونین ٹریٹری میں جزوی لاک ڈاؤن نافذ کیا ہے جس کے تحت بازاروں میں صرف پچاس فیصد دکان ہی کھلے رہتے ہیں اور مسافر بردار گاڑیوں کو بھی پچاس فیصد سواریاں اٹھانے کی اجازت دی جا رہی ہے۔