کشمیر: متعدد کوچنگ سینٹر بیرون ریاست منتقل، بیمار پڑنے کے بعد کئی طلبا واپس لوٹے

سری نگر: وادی کشمیر میں زائد از دو ماہ سے تعلیمی اداروں میں تعلیمی سرگرمیاں معطل رہنے کے باعث کئی کوچنگ سینٹروں نے اپنے سینٹرس بیرون ریاست منتقل کیے ہیں۔ ادھر وادی کے سینئر شہریوں نے وادی میں تعلیمی اداروں کے بدستور بند رہنے پر گہری تشویش اور فکر مندی کا اظہار کیا ہے۔

ذرائع نے بتایا کہ وادی بالخصوص سری نگر میں کوچنگ سینٹروں کے دوبارہ کھلنے کی کوئی امید نظر نہ آنے کے پیش نظر ان کے منتظمین نے انہیں شمالی ہندوستان کی مختلف ریاستوں میں منتقل کیا ہے۔ انہوں نے بتایا کہ کوچنگ سینٹروں کے منتظمین نے والدین کو اعتماد میں لے کر سینٹروں کو بیرون ریاست منتقل کیا ہے تاکہ ان میں زیر تعلیم بچوں کو آنے والے امتحانات کے لئے تیار کیا جاسکے۔

تاہم بعض والدین نے بتایا کہ ان کے بچے شمالی ہندوستان کی ریاستوں میں بیمار پڑ گئے جس کے بعد انہیں ان کو واپس بلانا پڑا۔ غلام حسن نامی ایک والد نے بتایا 'میں نے اپنی بیٹی کا داخلہ سری نگر کے ایک نامور کوچنگ سینٹر میں کیا تھا اور کورس کی پوری فیس جمع کی تھی۔ 5 اگست کو جب کشمیر میں ہڑتال ہوئی تو کچھ ہفتے گزرنے کے بعد کوچنگ سینٹر کی انتظامیہ نے مذکورہ کوچنگ سینٹر کو چندی گڑھ منتقل کر دیا'۔

ان کا مزید کہنا تھا 'میری بیٹی چندی گڑھ منتقل ہونے کے چند روز بعد ہی بیمار پڑ گئی جس کے بعد مجھے اسے واپس بلانا پڑا۔ حکومت ہمارے بچوں کے مستقبل کے ساتھ کھلواڑ کر رہی ہے'۔ آکاش نامی ایک کوچنگ سینٹر جس کے زیر انتظام وادی کے مختلف علاقوں میں سینٹر چل رہے تھے، کے اندرونی ذرائع نے بتایا کہ آکاش کوچنگ سینٹر نے وادی کے تمام سینٹروں کے طلبا اور عملے کو ہماچل پردیش منتقل کیا ہے۔

انہوں نے بتایا کہ ہماچل پردیش میں قائم آکاش کے کوچنگ سینٹروں میں قریب چھ سو طلبا زیر تعلیم ہیں جن کے لئے سینٹر ہی قیام وطعام کا بندوبست کررہا ہے۔ تاہم بعض سینٹروں کو ریاست کی سرمائی راجدھانی جموں منتقل کیا گیا ہے۔ قابل ذکر ہے کہ وادی میں پانچ اگست سے تمام تعلیمی اداروں میں تعلیمی سرگرمیاں بدستور معطل ہیں۔ صوبائی کمشنر بصیر احمد خان کی طرف سے ہائر اسکینڈری سطح تک کے تمام اسکولوں میں تعلیمی سرگرمیاں بحال کرنے کی ہدایات کے باوصف وادی کے تعلیمی اداروں میں تعلیمی سرگرمیاں مفلوج ہیں۔