کشمیر: ریکارڈ ساز سردیوں کا سلسلہ جاری، معمولات زندگی متاثر

سری نگر: وادی کشمیر میں جاری ریکارڈ ساز سردیوں سے جہاں ایک طرف معمولات زندگی متاثر ہونے لگے ہیں، وہیں دوسری طرف ڈاکٹروں نے لوگوں کو خاص کر عمر رسیدہ افراد کو حد درجہ احتیاط برتنے کا مشورہ دیا ہے۔ گرمائی دارلحکومت سری نگر میں جمعہ اور ہفتے کی درمیانی شب رواں موسم کی سرد ترین شب رہی جہاں کم سے کم درجہ حرارت منفی 6.6 ڈگری سینٹی گریڈ ریکارڈ کیا گیا۔ سردیوں کے لئے مشہور لداخ یونین ٹریٹری کے قصبہ دارس میں گزشتہ شب کا کم سے کم درجہ حرارت منفی 29.0 ڈگری سینٹی گریڈ ریکارڈ ہوا ہے۔

ادھر محکمہ موسمیات کا کہنا ہے کہ وادی کشمیر میں 20 دسمبر کو موسم کروٹ بدل سکتا ہے جس کے پیش نظر کہیں کہیں ہلکے درجے کا برف و باراں متوقع ہے۔ انہوں نے کہا ہے کہ مطلع ابر آلود رہنے کی صورت میں کم سے کم درجہ حرارت میں قدرے بہتری واقع ہونے کی توقع ہے۔ وادی کشمیر میں جاری شدید سردی کے پیش نظر ڈاکٹروں نے لوگوں کو بالخصوص عمر رسیدہ افراد کو حد درجہ احتیاط برتنے کا مشورہ دیا ہے۔

انہوں نے لوگوں سے کہا ہے کہ وہ صبح اور شام کے وقت گھروں سے باہر نکلنے میں احیتاط کریں اور اگر مجبوری کی حالت میں گھر سے باہر نکلنا پڑے تو اپنے آپ کو پوری طرح سے گرم لباس میں ڈھانپ کر ہی نکلیں۔ ادھر وادی میں ہفتے کی روز بھی موسم نہ صرف خشک رہا بلکہ صبح سے ہی آفتاب بھی نمودار رہا جس سے شبانہ سردی سے لوگوں کو قدرے راحت نصیب ہوئی۔

سردی کے پیش نظر وادی میں لوگ صبح کے وقت دیر سے ہی گھروں سے نکلتے ہیں۔ بازاروں میں دکانیں بھی صبح کے وقت دیر سے ہی کھلتی ہیں اور شام ڈھلتے ہی بند ہوجاتی ہیں جبکہ سڑکوں پر ٹرانسپورٹ کا بھی یہی حال ہے۔ لوگوں کا الزام ہے کہ سردیوں میں اضافے کے ساتھ جہاں ایک طرف پانی کی قلت پیدا ہوئی ہے وہیں بجلی کی آنکھ مچولی رہی سہی کسر کو پوری کر دیتی ہے۔ ان کا کہنا ہے کہ یہ حال خشک موسم میں ہے جب برف باری ہوگی تو لوگوں کا حال مزید ابتر ہوگا۔

متعلقہ محکمہ کے مطابق گرمائی دارلحکومت سری نگر میں گزشتہ شب کم سے کم درجہ حرارت منفی 6.6 ڈگری سینٹی گریڈ جبکہ قاضی گنڈ میں کم سے کم درجہ حرارت منفی 5.9 ڈگری سینٹی گریڈ ریکارڈ ہوا ہے۔ وادی کے شہرہ آفاق سیاحتی مقام گلمرگ میں گزشتہ شب کا کم سے کم درجہ حرارت منفی 9.2 ڈگری سینٹی گریڈ جبکہ دوسرے مشہور سیاحتی مقام پہلگام میں کم سے کم درجہ حرارت منفی 9.5 ڈگری سینٹی گریڈ ریکارڈ کیا گیا۔

سرحدی ضلع کپوارہ میں کم سے کم درجہ حرارت منفی 6.0 ڈگری سینٹی گریڈ جبکہ ککر ناگ میں بھی کم سے کم درجہ حرارت منفی 6.0 ڈگری سینٹی گریڈ ریکارڈ ہوا ہے۔ سردیوں کے لئے مشہور لداخ یونین ٹریٹری کے قصبہ دراس میں گزشتہ شب کا کم سے کم درجہ حرارت منفی 29.0 ڈگری سینٹی گریڈ ریکارڈ ہوا ہے جبکہ ضلع کرگل میں کم سے کم درجہ حرارت منفی 21.1 ڈگری سینٹی گریڈ ریکارڈ اور ضلع لیہہ میں منفی 18.3 ڈگری سینٹی گریڈ ریکارڈ کیا گیا۔