کشمیر: سابق وزیر اعلیٰ اور پی ڈی پی صدر محبوبہ مفتی ایک بار پھر خانہ نظر بند

سری نگر: پی ڈی پی صدر اور سابق وزیر اعلیٰ محبوبہ مفتی کو منگل کے روز مبینہ طور پر اپنی رہائش گاہ پر ایک بار پھر نظر بند کر دیا گیا۔ موصوفہ کا کہنا ہے کہ مجھے ایک بار پھر نظر بند کیا گیا ہے کیونکہ میں بڈگام جانا چاہتی تھی جہاں سینکڑوں لوگوں کو بے گھر کر دیا گیا ہے۔ قبل ازیں موصوفہ کے دعوے کے مطابق انہیں 25 نومبر کو اپنی رہائش گاہ سے باہر نکلنے کی اجازت نہیں دی گئی تھی۔

انہوں نے اپنے ایک ٹویٹ میں کہا تھا کہ ’مجھے ایک بار پھر خانہ نظر بند رکھا گیا ہے اور جموں و کشمیر انتظامیہ گزشتہ دو دنوں سے مجھے وحید الرحمان پرہ کے گھر واقع پلوامہ جانے کی اجازت نہیں دے رہی ہے‘۔ تاہم جموں و کشمیر پولیس نے محبوبہ مفتی کے نظر بندی کے اس دعوے کو مسترد کیا تھا۔

محبوبہ مفتی نے منگل کے روز نظر بندی کے رد عمل میں اپنے ایک ٹوئٹ میں کہا کہ ’غیر قانونی طور پر نظر بند کرنا حکومت ہند کا کسی بھی طرح کی اپوزیشن کو دبانے کا محبوب طریقہ کار بن گیا ہے۔ مجھے ایک بار پھر نظر بند کر دیا گیا، میں بڈگام کا دورہ کرنا چاہتی تھی جہاں سینکڑوں لوگوں کو بے گھر کر دیا گیا ہے‘۔ انہوں نے اپنے ایک اور ٹوئٹ میں کہا کہ ’حکومت ہند بغیر کوئی سوال پوچھے جموں و کشمیر کے لوگوں پر مسلسل مظالم ڈھا رہی ہے‘۔