کشمیر: غیر مقامی بینک منیجر کے قتل میں ملوث ملی ٹینٹ تصادم کے دوران ہلاک، پولیس کا دعویٰ

سری نگر: جنوبی کشمیر کے ضلع شوپیاں کے کنجہ لر علاقے میں شبانہ تصادم آرائی کے دوران لشکر طیبہ سے وابستہ دو ملی ٹینٹ مارے گئے۔کشمیر پولیس زون نے اپنے ٹوئٹر ہینڈل پر سلسلہ وار ٹوئٹس میں اس انکاؤنٹر کے بارے میں تفصیلات فراہم کرتے ہوئے کہا کہ شوپیاں انکاؤنٹر میں لشکر طیبہ سے وابستہ دو ملی ٹینٹ مارے گئے۔

مہلوک ملی ٹینٹوں کی شناخت جان محمد لون ساکن شوپیاں اور طفیل گنائی کے بطور کی گئی۔ ایک ٹوئٹ میں کہا گیا کہ مہلوک ملی ٹینٹ جان محمد دیگر جرائم کے علاوہ علاقائی دیہاتی بینک منیجر وجے کمار کی ہلاکت میں بھی ملوث تھا۔

بتادیں کہ وجے کمار کو کولگام میں ماہ رواں کی دو تاریخ کو اپنے بینک میں ہی مارا گیا تھا۔ پولیس نے ایک اور ٹوئٹ میں کہا کہ جائے تصادم آرائی سے اسلحہ و گولہ بارود بر آمد کیا گیا جس میں ایک اے کے47 رائفل اور ایک پستول شامل ہے۔