کشمیر: چلہ خورد کا پہلا عشرہ خوشگوار مگر شبانہ سردی جاری

سری نگر: وادی کشمیر میں 20 دنوں پر محیط چلہ خورد کے پہلے عشرے کے دوران موسم اگرچہ خشک ہی نہیں بلکہ خوشگوار بھی ہے لیکن شبانہ درجہ حرارت نقطہ انجماد سے مسلسل نیچے درج ہو رہا ہے جس کے باعث لوگوں کو دوران شب ٹھٹھرتی سردی سے راحت نصیب نہیں ہو رہی ہے۔

بتادیں کہ وادی میں سردیوں کے بادشاہ چلہ کلان کے 40 روزہ دور حکومت کے اختتام کے بعد 20 روزہ چلہ خورد کا دوراقتدار ماہ جنوری کی 31 تاریخ سے شروع ہوتا ہے تاہم اس دوران اگرچہ بھاری برف باری کو خارج از امکان قرار نہیں دیا جاسکتا لیکن سردیوں کی شدت میں ہر گزرتے دن کے ساتھ کمی واقع ہو جاتی ہے۔

ادھر محکمہ موسمیات نے وادی میں 10 فروری تک موسم خشک رہنے کی پیش گوئی کی ہے تاہم 11 اور 12 فروری کو ہلکے سے درمیانی درجے کی برف و باراں توقع ہے۔ وادی کا بیرون دنیا کے ساتھ زمینی و فضائی رابطہ برابر برقرارو بحال ہے۔ ہائی وے ذرائع کے مطابق وادی کو ملک کے دوسرے حصوں کے ساتھ جوڑنے والی سری نگر – جموں قومی شاہراہ پر یک طرفہ ٹریفک کی نقل وحمل جاری وساری ہے۔

انہوں نے بتایا کہ قومی شاہراہ ہفتے کے روز بھی یک طرفہ ٹریفک کی نقل وحمل کے لئے کھلی رہی اور گاڑیوں کو سری نگر سے جموں روانہ ہونے کی اجازت تھی۔ وادی کشمیر میں 20 روزہ چلہ خورد کے پہلے عشرے کے دوران ہفتے کے روز بھی موسم خشک ہی نہیں بلکہ خوشگوار رہا تاہم شبانہ سردیوں کا زور تھمنے کا نام ہی نہیں لے رہا ہے جس کے باعث لوگوں کا دوران شب سردی کی شدت سے پریشان ہونے کا سلسلہ جاری ہے۔

ادھر لوگوں کو دوران دن خوشگوار موسم سے محظوظ ہونے کے لئے پارکوں، دکان کے تھڑوں اور سڑک کے کناروں پر ٹولیوں میں بیٹھے دیکھا جارہا ہے۔ سری نگر کے قلب لالچوک میں واقع پرتاب پارک میں دھوپ سے لطف اٹھا رہے محمد رمضان خان نامی ایک سن رسیدہ شہری نے یو این آئی اردو کو بتایا: 'امسال چلہ کلان نے جینا حرام کردیا اب چلہ خورد کے دوران موسم خوشگوار ہے اللہ کرے موسم کا یہی روپ آگے بھی جاری رہے'۔

محکمہ موسمیات کے ایک ترجمان کے مطابق سری نگر میں کم سے کم درجہ حرارت منفی 3.9 ڈگری سینٹی گریڈ ریکارڈ کیا گیا جبکہ وادی کے مشہور آفاق سیاحتی مقامات پہلگام اور گلمرگ میں کم سے کم درجہ حرارت بالترتیب منفی 11.2 ڈگری سینٹی گریڈ اور منفی 11.4 ڈگری سینٹی گریڈ ریکارڈ ہوا ہے۔

وادی کے سرحدی ضلع کپواڑہ میں کم سے کم درجہ حرارت منفی 4.7 ڈگری سینٹی گریڈ جبکہ قاضی گنڈ اور کوکرناگ میں کم سے کم درجہ حرارت بالترتیب منفی 5.8 ڈگری سینٹی گریڈ اور منفی 3.9 ڈگری سینٹی گریڈ ریکارڈ ہوا ہے۔ لداخ یونین ٹریٹری کے ضلع کرگل اور لیہہ میں کم سے کم درجہ حرارت بالترتیب منفی 19.4 ڈگری سینٹی گریڈ اور منفی 14.7 ڈگری سینٹی گریڈ ریکارڈ کیا گیا جبکہ دراس میں کم سے کم درجہ حرارت منفی 29.1 ڈگری سینٹی گریڈ ریکارڈ کیا گیا۔