کشمیر: بڈگام میں کمسن بچی کی جان لینے والے تیندوے کو زندہ پکڑ لیا گیا

سری نگر: محکمہ وائلڈ لائف نے وادی کشمیر کے قرب و جوار میں گھوم رہے جنگلی جانوروں کے خلاف بڑے پیمانے پر آپریشن شروع کیا ہے۔ اس آپریشن کے تحت محکمے کے عملے نے وسطی ضلع بڈگام کے ضلع مجسٹریٹ کے دفتر کے احاطے میں منگل کے روز ایک تیندوے کو زندہ پکڑنے میں کامیابی حاصل کی۔ بتایا جاتا ہے کہ یہ وہی تیندوا ہے جس نے گیارہ روز قبل بڈگام کی ہی اوم پورہ ہاؤسنگ کالونی میں ایک چار سالہ بچی کو اپنے صحن سے ہی اٹھا کر متصل ہی واقع ایک فارسٹ نرسری میں اپنا نوالہ بنالیا تھا۔

سرکاری ذرائع نے بتایا کہ ضلع مجسٹریٹ دفتر بڈگام کے متصل واقع ایک فارسٹ نرسری میں اس تیندوے کو دیکھا گیا اور متعلقہ محکمہ نے اس کی تلاش تیز کردی۔ انہوں نے بتایا کہ محکمے کے عملے کی انتھک کاوشوں کے بعد اس تیندوے کو منگل کے روز زندہ پکڑ لیا گیا۔ دریں اثنا مقامی لوگوں نے اس تیندوے کو پکڑنے پر راحت کی سانس لی ہے۔ انہوں نے متعلقہ محکمے کی گزشتہ کئی دنوں سے جاری کاوشوں کی سراہنا بھی کی۔

قابل ذکر ہے کہ وادی کشمیر کے قرب وجوار کی بستیوں میں جنگلی جانوروں کے دن دھاڑے گھومنے پھرنے اور انسانوں پر حملہ آور ہونے کی خبریں اب ایک معمول بن گئی ہیں۔ ذرائع کے مطابق وسطی ضلع بڈگام کے کئی علاقوں میں جنگلی جانور گھوم رہے ہیں جن کو پکڑنے کے لئے محکمہ کا آپریشن جاری ہے۔