’كارتی چدمبرم کی گرفتاری بدلے کی کارروائی‘

نئی دہلی: مرکزی تفتیش بیورو (سی بی آئی) آئی این ایکس میڈیا منی لانڈرنگ معاملہ میں سابق وزیر خزانہ پی چدمبرم کے بیٹے كارتی چدمبرم کو (آج) بدھ کی صبح چنئی ایئر پورٹ سے گرفتار کیا گیا ہے۔

سی بی آئی ذرائع نے اس کی تصدیق کرتے ہوئے بتایا کہ كارتی چدمبرم کوچنئی سے گرفتار کیا گیا۔ ذرائع نے بتایا کہ كارتی تحقیقات میں تعاون نہیں کر رہے تھے۔

اس سے قبل 19 جنوری کو کارتی چدمبرم سے ای ڈی نے تقریباً 11 گھنٹے تک پوچھ گچھ کی تھی۔ ای ڈی نے مئی 2017 میں کارتی اور دیگر افراد کے خلاف معاملہ درج کیا تھا۔

کارتی پر الزام ہے کہ انہوں نے ٹیکس سے متعلق جانچ سے بچنے کے لئے پیٹر اور اندرانی مکھرجی کے مالکانہ حق والی میڈیا کمپنی آئی این ایکس سے مبینہ طور پر رقم حاصل کی۔ وہیں کارتی اور ان کے والد پی چدمبرم نے ان کے خلاف عائد کئے گئے الزامات کو غلط قرار دیا ہے۔

اس معاملہ میں سیاسی میدان میں بھی ہلچل تیز ہو گئی ہے۔ اس معاملہ پر رد عمل پیش کرتے ہوئے کانگریس ترجمان پرینکا چترویدی نے کہا کہ اپنی بدعنوانی کو چھپانے کا مودی حکومت کا یہ کلاسیکل طریقہ ہے جس کا ہر دن پردہ فاش ہو رہا ہے۔ چاہے وہ نیرو مودی، میہل چوکسی یا پھر دوارکا داس سیٹھ جویلرس کا معاملہ ہو۔

انہوں نے کہا کہ بی جے پی بدلے کی نیت سے اپنے مخالفین کو نشانہ بنا رہی ہے لیکن وہ کانگریس کو عوام تک سچائی پہنچانے سے نہیں روک پائے گی۔