کرناٹک: 14 باغی ممبر اسمبلی نااہل قرار، انتخاب لڑنے پر بھی روک

بنگلور: کرناٹک اسمبلی اسپیکر کے آر رمیش کمار نے کانگریس اور جنتا دل (ایس) کے 14 باغی ممبران اسمبلی کو پارٹی بدل قانون کے تحت اتوار کو نااہل قرار دے دیا۔ علاوہ ازیں نااہل قرار دیئے گئے ارکان موجودہ اسمبلی کی مدت کار کے دوران انتخاب بھی نہیں لڑ پائیں گے۔

رمیش کمار نے جنتا دل (ایس) کے تین ممبران اسمبلی سمیت 14 باغی ممبران اسمبلی کو فوری طور پر نااہل قرار دیا۔ اس کے ساتھ ہی نااہل ممبران اسمبلی کی تعداد بڑھ کر 17 ہو گئی ہے۔ اسمبلی اسپیکر نے گزشتہ ہفتہ کانگریس کے دو اور ایک آزاد ممبر اسمبلی کو نااہل قرار دیا تھا۔

ان ممبران اسمبلی کو نااہل قرار دیئے جانے کے بعد 225 رکنی اسمبلی میں کل 208 نشستیں رہ گئی ہیں۔ ریاست میں 14 ماہ پرانی کانگریس-جنتا ادل (ایس) مخلوط حکومت گرنے کے بعد حکومت بنانے والی بھارتیہ جنتا پارٹی (بی جے پی) کے 105 رکن اسمبلی ہیں اور پارٹی کو ایک آزاد ممبر اسمبلی کی حمایت حاصل ہے۔

ارکان اسمبلی کو نااہل قرار دینے کا فیصلہ کرنے کے بعد اسپیکر رمیش کمار نے کہا کہ میں نے کوئی چالاکی یا ڈرامہ نہیں کیا، بلکہ مہذب طریقہ سے فیصلہ لیا ہے۔

میڈیا سے بات کرتے ہوئے انہوں نے کہا، ’’بی ایس یدی یورپا نے مجھے کل (سوموار) تک تحریک اعتماد کی نگہداشت کرنے کو کہا ہے۔ فنانس بل 31 جولائی کو منظور کرنا ہے۔ میں تمام ارکان اسمبلی سے تحریک اعتماد کے دوران موجود رہنے کی اپیل کرتا ہوں۔‘‘

کرناٹک میں گذشتہ دنوں چلے سیاسی بحران کا ذکر کرتے ہوئے اسپیکر نے کہا، ’’ہم کہاں جا پہنچے ہیں! ایک اسپیکر کے طور پر حالات سے نمٹنے کے لئے میرے اوپر جس طرح کا دباؤ ڈالا گیا، اس نے مجھے افسردگی کے سمندر میں ڈھکیل دیا۔‘‘

طویل مدت تک چلے سیاسی ڈرامہ کے بعد جمعرات کو کرناٹک اسمبلی کے اسپیکر نے تین باغی ارکان اسمبلی کو نااہل قرار دیا تھا۔ ان ارکان میں آر شنکر، رمیش جرکہولی اور مہیش کمتھلی شامل ہیں۔ اس وقت بقیہ باغی ارکان اسمبلی کے حوالہ سے اسپیکر کے آر رمیش نے کہا تھا کہ ’’میرے پاس کئی شکایتیں ہیں اور مجھے فیصلہ لینے کے لئے مزید وقت درکار ہے۔ ایسے معاملات میں مطالعہ کرنا پڑتا ہے۔‘‘ اس کے بعد اتوار کے روز ایک پریس کانفرنس سے خطاب کرنے ہوئے اسپیکر رمیش کمار نے بقیہ 14 ارکان اسمبلی کو نااہل قرار دینے کا فیصلہ سنا دیا۔

نااہل قرار دیئے گئے ارکان اسمبلی

کانگریس: بیراٹھی بسوراج، منی رتنم، ایس ٹی سوم شیکھر، روشن بیگ، آنند سنگھ، ایم ٹی بی ناگراج، بی سی پاٹل، پرتاپ گوڈا پاٹل، ڈاکٹر سودھاکر، شیوراج ھیبار اور شری منت پاٹل۔ جے ڈی ایس: گوپالییا، نارائن گوڈا اور اے ایچ وشوناتھ۔