کرناٹک-مہاراشٹر سرحد تنازعہ ایک سازش، انتخاب سے قبل ریاست میں ماحول خراب کرنے کی ہو رہی کوشش: کانگریس

پڑوسی ریاست مہاراشٹر کے ساتھ سرحد تنازعہ سے پیدا کشیدگی کے درمیان کرناٹک کانگریس نے اسے ایک ’سازش‘ قرار دیا ہے۔ کرناٹک کانگریس صدر ڈی کے شیوکمار نے کہا کہ انتخاب سے قبل ریاست میں ماحول خراب کرنے کی کوشش کی جا رہی ہے۔ شیوکمار کا کہنا ہے کہ ’’ہمارے وزیر اعلیٰ بسوراج بومئی ریاست میں برسراقتدار بی جے پی حکومت پر حملوں کو چھپانے کے لیے اسے ایک بڑا ایشو بنا رہے ہیں۔ اس کے پیچھے ایک سازش ہے۔‘‘

کانگریس لیڈر کا کہنا ہے کہ سرحد تنازعہ پہلے ہی حل کر لیا گیا ہے۔ ہماری سرحدوں کے اندر کا علاقہ ہمارا ہے، ان کے علاقے میں واقع علاقہ ان کا ہے۔ جو بھی ہماری طرف ہیں وہ ہمارے لوگ ہیں۔ شیوکمار کا کہنا ہے کہ سرحد تنازعہ کے بہانے مہاراشٹر میں کسی بھی پارٹی سے جڑے لوگوں کے لیے امن و امان کا ماحول خراب کرنا مناسب نہیں ہے۔ انھوں نے کہا کہ ’’ہم نے بیلگاوی میں سوورنا سودھا کی تعمیر کی۔ کسی کو بھی ماحول خراب کرنے میں شامل نہیں ہونا چاہیے۔‘‘

مہاراشٹر حکومت نے 2004 میں کرناٹک کے چار اضلاع بیلگاوی شہر اور 865 گاؤں پر اپنے حقوق کا دعویٰ کرتے ہوئے سپریم کورٹ میں عرضی لگائی۔ کرناٹک کے سرحدی اضلاع میں کشیدہ حالات ہیں اور پولیس محکمہ نے بہتر قانون و انتظام کو یقینی بنانے کے لیے پورے سرحدی علاقے میں سیکورٹی کے وسیع انتظام کیے ہیں۔

ایک سیاسی تنظیم، مہاراشٹر ایکی کرن سمیتی (ایم ای ایس) نے بی جے پی-شیوسینا اتحاد حکومت کے دو وزراء کو بیلگاوی میں مدعو کیا ہے اور کنڑ تنظیموں نے ریاستی حکومت کو انھیں ریاست میں اجازت نہیں دینے کی تنبیہ دی ہے۔ بہرحال، کانگریس کی طرف سے حالات پر دیے گئے بیان نے ریاست میں ایک نئی بحث چھیڑ دی ہے۔