کرناٹک: کانگریس نے بی جے پی صدر جے پی نڈا اور وزیر اعلیٰ بومئی کے خلاف درج کرائی شکایت، سنگین الزامات عائد

ایک طرف کرناٹک میں اسمبلی انتخاب کو لے کر سبھی سیاسی پارٹیاں خود کو مضبوط بنانے کی کوشش کر رہی ہیں، اور دوسری طرف اپنی حریف پارٹیوں کی غلط پالیسیوں کو تنقید کا نشانہ بھی بنا رہی ہیں۔ ریاست میں برسراقتدار بی جے پی اور حزب مخالف کانگریس کے درمیان بھی خوب رسہ کشی دیکھنے کو مل رہی ہے۔ تازہ ترین اطلاعات کے مطابق کانگریس نے بی جے پی قومی صدر جے پی نڈا، وزیر اعلیٰ بسوراج بومئی اور رکن اسمبلی رمیش جارکیہولی کے خلاف پولیس میں شکایت درج کرائی ہے۔ کانگریس نے بی جے پی لیڈران پر اسمبلی انتخاب میں ووٹروں کو لبھانے کے لیے رشوت دینے کی پیشکش کا الزام عائد کیا ہے۔

میڈیا رپورٹس کے مطابق کانگریس کی طرف سے ریاستی صدر ڈی کے شیوکمار اور حزب مخالف لیڈر سدارمیا نے پولیس کو دی گئی شکایت پر دستخط کیے ہیں اور معاملے کی اعلیٰ سطحی جانچ کا مطالبہ کیا ہے۔ دراصل بی جے پی لیڈر رمیش جارکیہولی نے حال ہی میں بیلگاوی میں ایک جلسہ عام کے دوران کہا تھا کہ ’’اگر موجودہ کانگریس رکن اسمبلی 3 ہزار روپے کے گفٹ اور نقد دیں گے تو میں ووٹروں کو 6 ہزار روپے کی قیمت کے تحائف دوں گا۔‘‘ حالانکہ بی جے پی نے رمیش جاکیہولی کے بیان سے کنارہ کشی اختیار کرتے ہوئے اسے ان کا ذاتی بیان قرار دے دیا ہے۔

قابل ذکر ہے کہ رمیش جارکیہولی گوکک اسمبلی حلقہ سے رکن اسمبلی تھے، لیکن 2021 میں ایک فحش ویڈیو معاملے مین نام سامنے آنے کے بعد انھیں استعفیٰ دینا پڑا تھا۔ اب ان کے تازہ بیان کی وجہ سے بی جے پی کو مسائل کا سامنا کرنا پڑ رہا ہے۔ کانگریس نے اپنی شکایت میں الزام عائد کیا ہے کہ یہ ایک بڑی سازش کا حصہ ہے جو بی جے پی میں بڑی سطح پر تیار کی گئی ہے۔ کانگریس کا کہنا ہے کہ اس سازش کو وزیر اعلیٰ بومئی، جے پی نڈا اور پارٹی کے ریاستی صدر نل کمار کی بھی خاموش حمایت حاصل ہے۔

کانگریس نے الزام عائد کیا ہے کہ بی جے پی لیڈر کا بیان جمہوریت کا اغوا کرنے کی کوشش ہے اور تعزیرات ہند کی دفعہ 171بی، 107، 120بی، 506 کے تحت جرم بھی ہے۔ کانگریس لیڈران کا کہنا ہے کہ کرناٹک میں 5 کروڑ ووٹرس ہیں اور بی جے پی 30 ہزار کروڑ روپے تقسیم کر اسمبلی انتخاب جیتنے کی بڑی سازش تیار کر رہی ہے۔ کانگریس نے اس معاملے کی آئی ٹی محکمہ اور ای ڈی سے جانچ کرانے کا مطالبہ کیا ہے۔