بی جے پی کو شکست دینے کے لئے متحد ہوں سیکولر طاقتیں: کنہیا کمار

پٹنہ : ہندوستانی کمیونسٹ پارٹی (سی پی آئی) لیڈر اور جواہر لال نہرو یونیورسٹی طلبا یونین کے سابق صدر کنہیا کمار نے لوک سبھا انتخابات میں بھارتیہ جنتا پارٹی (بی جے پی) کو شکست دینے کے لئے سیکولر جماعتوں سے متحد ہونے کی اپیل کرتے ہوئے آج کہا کہ اس مقصد کو حاصل کرنے کے لئے پارٹیوں کو اپنے مفادات سے اوپر اٹھنے کی ضرورت ہے۔

بیگو سرائے سیٹ سے سی پی آئی کے امیدوار بنائے گئے کنہیا کمار نے یہاں پریس کانفرنس میں کہا کہ وقت کا تقاضہ ہے کہ لوک سبھا انتخابات میں کسی بھی حال میں بی جے پی کو شکست دی جائے کیونکہ اگر مرکز میں بی جے پی کی دوبارہ حکومت بنی تو قوم کے لئے بڑا خطرہ ثابت ہوگا۔

انہوں نے کہا کہ اگر انتخابات میں بی جے پی کو لوک سبھا میں کافی تعداد میں اکثریت مل گئی تو وہ آر ایس ایس (سنگھ) کے ایجنڈے کے مطابق آئین میں چھیڑ چھاڑ شروع کر دے گی۔ انہوں نے کہا کہ بی جے پی کو شکست دینے کے لئے اگر سی پی آئی کو کچھ علاقوں میں اپنے مفادات کی قربانی بھی دینی پڑے تو وہ پیچھے نہیں ہٹے گی۔

سی پی آئی لیڈر نے کہا کہ ان کی پارٹی بی جے پی کو شکست دینے کے لئے بہار میں مهاگٹھ بندھن کو حمایت دے گی اور اس کے لئے سخت محنت بھی کرے گی۔ اگرچہ انہوں نے کہا کہ مهاگٹھ بندھن میں سیٹوں کی تقسیم کے دوران سی پی آئی کی مانگ پر غور نہیں کیا گیا لیکن اس سے بی جے پی کو سخت شکست دینے کے لئے مهاگٹھ بندھن کو حمایت دینے کی ان کی پارٹی کے ارادے پر کوئی اثر نہیں پڑے گا۔