سی بی آئی تنازعہ: ناگیشور راؤ کیس سے جسٹس رمنا نے بھی خود کو کیا الگ، پہلے بھی دو جج ہو چکے ہیں علیحدہ

سپریم کورٹ کے جسٹس این وی رمنا نے ناگیشور راؤ کو سی بی آئی کا عارضی ڈائریکٹر بنائے جانے کے خلاف داخل عرضی سے خود کو الگ کر لیا ہے۔ سماعت سے خود کو الگ کرتے ہوئے رمنا نے کہا کہ وہ ایم ناگیشور راؤ کی بیٹی کی شادی میں شامل ہوئے تھے۔ بتا دیں کہ اس معاملے سے چیف جسٹس آف انڈیا رنجن گوگوئی اور جسٹس اے کے سیکری خود کو پہلے ہی الگ کر چکے ہیں۔ اب ایک بار پھر یہ معاملہ ایک نئی بنچ کے حوالے کیا جائے گا۔ جسٹس رمنا نے معاملہ کو مناسب بنچ کے سامنے لسٹیڈ کرنے کے لیے چیف جسٹس کے پاس بھیج دیا۔

اس سے قبل 24 جنوری کو سماعت کے دوران جسٹس سیکری نے خود کو کیس سے الگ کر لیا تھا۔ انھوں نے خود کو الگ کرتے ہوئے کہا تھا کہ وہ 10 جنوری کو ہوئی اس سلیکشن کمیٹی کی میٹنگ کا حصہ تھے، اس لیے معاملے میں بنے رہنے کے لیے اپنی نااہلیت ظاہر کی۔ وہیں غیر سرکاری تنظیم ’کامن کاؤز‘ کی جانب سے پیش سینئر وکیل دشینت دَوے نے کہا تھا کہ ’’انہیں کافی مایوسی ہو رہی ہے۔ ایسا لگ رہا ہے کہ جج اس معاملے کی سماعت کرنا ہی نہیں چاہتے۔‘‘

واضح رہے کہ اس معاملے کی سماعت جسٹس سیکری سے پہلے چیف جسٹس آف انڈیا رنجن گوگوئی کو کرنی تھی لیکن انھوں نے کہا تھا کہ وہ 24 جنوری کو ہونے والی سی بی آئی کے نئے ڈائریکٹر کو منتخب کرنے والی میٹنگ میں حصہ لینے والے ہیں اس لیے اس کیس کی سماعت نہیں کر سکتے۔

غور طلب ہے کہ گزشتہ سال 23 اکتوبر کو مرکزی حکومت نے سی بی آئی کے دو بڑے افسران پر بدعنوانی کے الزامات عائد کیے جانے کے بعد انھیں جبراً چھٹی پر بھیج دیا تھا۔ سی بی آئی ڈائریکٹر آلوک ورما کی جگہ ناگیشور راؤ کو عارضی ڈائریکٹر مقرر کیا گیا تھا۔ اس فیصلے کے خلاف سپریم کورٹ سے آلوک ورما کو راحت ملی اور انھوں نے دوبارہ ذمہ داری سنبھال لی تھی۔ لیکن اس کے ٹھیک بعد اعلیٰ سطحی کمیٹی نے انھیں سی بی آئی ڈائریکٹر عہدہ سے پھر ہٹا دیا۔ اس کے بعد ناگیشور راؤ کو دوبارہ عارضی ڈائریکٹر مقرر کیا گیا۔ اس تقرری کے خلاف ہی سپریم کورٹ میں عرضی داخل کی گئی ہے۔