جسٹس منیشورناتھ بھنڈاری مدراس کے چیف جسٹس مقرر

نئی دہلی: جسٹس منیشورناتھ بھنڈاری کو مدراس ہائی کورٹ کا چیف جسٹس مقرر کیا گیا ہے۔ جسٹس بھنڈاری کی تقرری کے علاوہ تین دیگر ہائی کورٹس میں 16 ججوں کی تقرری کی گئی ہے۔ مرکزی وزارت برائے قانون و انصاف کے محکمہ انصاف کی طرف سے جمعرات کو تقرریوں سے متعلق الگ الگ نوٹیفکیشن جاری کئے گئے۔

نوٹیفیکیشن کے مطابق صدر نے سپریم کورٹ کےکالجیم کی سفارش پر مدراس کے چیف جسٹس کی حیثیت سے جسٹس بھنڈاری اور دیگر ججوں کی تقرری کی منظوری دی ہے۔ آندھرا پردیش ہائی کورٹ کے لیے سب سے زیادہ سات، مدھیہ پردیش ہائی کورٹ کے لیے چھ اور اڈیسہ ہائی کورٹ کے لیے تین ججوں کا تقرر کیا گیا ہے۔

سپریم کورٹ کالجیم کی 29 جنوری 2022 اور 14 دسمبر 2021 کو منعقد ہوئی میٹنگوں میں جسٹس بھنڈاری کو چیف جسٹس مقرر کرنے کے لیے سفارش کرنے کا فیصلہ لیا گیا تھا ۔ جسٹس بھنڈاری اس وقت مدراس ہائی کورٹ کے کارگذار چیف جسٹس ہیں۔ مدراس ہائی کورٹ کے اس وقت کے چیف جسٹس سنجیو بنرجی کا میگھالیہ ہائی کورٹ تبادلہ کیا گیا تھا۔