جیتو پٹواری بنے مدھیہ پردیش کانگریس کے صدر، اُمنگ سنگھار ہوں گے حزب مخالف لیڈر

مدھیہ پردیش میں کانگریس نے ایک بڑی تبدیلی کا اعلان کیا ہے۔ کانگریس صدر ملکارجن کھڑگے نے ہفتہ کے روز سابق وزیر اعلیٰ اور پارٹی کے سینئر لیڈر کمل ناتھ کو ہٹا کر جیتو پٹواری کو نیا ریاستی یونٹ چیف مقرر کیا ہے۔

کانگریس جنرل سکریٹری (تنظیم) کے سی وینوگوپال نے جانکاری دیتے ہوئے کہا کہ کانگریس صدر نے فوری اثر سے جیتو پٹواری کو مدھیہ پردیش کانگریس کمیٹی کا صدر مقرر کیا ہے۔ انھوں نے مزید کہا کہ پارٹی کمل ناتھ کے تعاون کی شکرگزار ہے۔ وینوگوپال نے ایک اور اعلان کرتے ہوئے کہا کہ کانگریس صدر نے اُمنگ کو سی ایل پی لیڈر اور ہیمنت کٹارے کو ڈپٹی لیڈر مدھیہ پردیش بنانے کی تجویز کو بھی منظوری دے دی ہے۔

دوسری طرف کانگریس نے چھتیس گڑھ میں چرن داس مہنت کو قانون ساز پارٹی کا لیڈر مقرر کیا ہے۔ وہ گزشتہ اسمبلی میں ایوان کے اسپیکر تھے۔ وینوگوپال کے مطابق کانگریس صدر ملکارجن کھڑگے نے چھتیس گڑھ ریاستی کانگریس کمیٹی کے صدر دیپک بیج کو عہدہ پر بنائے رکھنے کی تجویز کو منظوری دے دی۔