پیٹ درد کا علاج کرانے پہنچے 2 نوجوانوں کو ڈاکٹر نے ’پریگننسی ٹسٹ‘ کا دیا مشورہ

جھارکھنڈ کے ایک سرکاری ڈاکٹر کا عمل ریاست میں محکمہ صحت کی بدنامی کی وجہ بن رہا ہے۔ دراصل جھارکھنڈ کے سمریا واقع ایک سرکاری اسپتال میں 2 نوجوان پیٹ درد کی شکایت لے کر پہنچے تھے۔ خبروں کے مطابق ڈاکٹر نے دونوں کو ہی اے این سی (اینٹی نیٹل چیک اَپ) یعنی پریگننسی ٹسٹ کرانے کا مشورہ دیا۔ یہ ٹسٹ حاملہ خواتین کے لیے ہوتا ہے اور یہی سبب ہے کہ ڈاکٹروں کے ذریعہ مذکورہ ٹسٹ لکھے جانے کے بعد محکمہ صحت کو شرمندگی کا سامنا کرنا پڑ رہا ہے۔

میڈیا ذرئع کے مطابق سمریا کے چوربورا گاؤں میں رہنے والے 2 نوجوانوں کو پیٹ میں کافی درد ہو رہا تھا۔ اہل خانہ انھیں سمریا ریفرل اسپتال لے گئے تھے جہاں ڈاکٹر مکیش نے ان کی جانچ کی۔ ساتھ ہی انھیں کچھ ٹسٹ کرانے کے لیے کہا جس کی تفصیل پرچی پر لکھ دی۔ اس پرچی میں اے این سی کرانے کی بات بھی لکھی گئی جسے دیکھ کر لوگوں کا حیران ہونا لازمی تھا۔ یہ پورا معاملہ یکم اکتوبر کا ہے لیکن یہ پرچی سوشل میڈیا پر اب وائرل ہو رہی ہے۔

بتایا جا رہا ہے کہ دونوں نوجوان جب پرچی کے مطابق اپنی جانچ کرانے کے لیے پہنچے تو پیتھولوجسٹ حیران رہ گیا۔ اس نے بتایا کہ پرچی میں پریگننسی یعنی حمل کی جانچ کرانے کے لیے لکھا گیا ہے۔ اس کے بعد پیتھولوجسٹ نے باقی جانچ کر دی لیکن اے این سی کرنے سے صاف انکار کر دیا۔ بعد ازاں دونوں نوجوان اپنے اپنے گھر لوٹ گئے۔

یہ پورا معاملہ جب منکشف ہوا تو سوشل میڈیا پر بھی وائرل ہو گیا۔ وائرل پوسٹ کے مطابق سمریا کے سرکاری اسپتال کی جانب سے پرچی نمبر 17028 اور 17032 پر ایچ آئی وی، ایچ بی اے (ہیموگلوبین)، ایچ سی سی، سی بی سی (کمپلیٹ بلڈ کاؤنٹ) اور اے این سی (اینٹی نیٹل چیک اَپ) کرانے کے لیے لکھا گیا۔ اس سلسلے میں جب پرچی لکھنے والے ڈاکٹر مکیش سے میڈیا نے بات کی تو انھوں نے اپنا دفاع کرتے ہوئے کہا کہ ’’مجھے بدنام کرنے کی کوشش کی جا رہی ہے۔ میں نے اے این سی ٹسٹ کرانے کے لیے نہیں کہا۔‘‘ ڈاکٹر مکیش کا کہنا ہے کہ رجسٹر میں اے این سی جانچ کے لیے نہیں لکھا گیا ہے۔ دونوں ہی پرچی پر اوور رائٹنگ کی گئی ہے۔

بہر حال، اس پورے معاملے میں اسپتال انتظامیہ کی کافی بدنامی ہو رہی ہے اور اسے سمجھ نہیں آ رہا کہ اپنا بچاؤ کس طرح کرے۔ سرکاری اسپتال کے سول سرجن ڈاکٹر ارون کمار پاسوان کا کہنا ہے کہ ’’معاملے کی جانکاری ملتے ہی انچارج کو جانچ کا حکم دے دیا گیا ہے۔ ساتھ ہی 2 دنوں کے اندر رپورٹ مانگی گئی ہے۔ جانچ رپورٹ ملنے کے بعد متعلقہ ڈاکٹر کے خلاف کارروائی کی جائے گی۔‘‘