جھارکھنڈ الیکشن: بی جے پی-آجسو کی دوستی ٹوٹنے سے کئی سیٹوں پر برسراقتدار پارٹی مشکل میں

جھارکھنڈ بننے کے بعد سے ہی اتحاد بنا کر الیکشن لڑنے والی بی جے پی اور آل جھارکھنڈ اسٹوڈنٹ یونین یعنی آجسو کی راہیں اس الیکشن میں الگ ہو گئی ہیں۔ ریاست میں اس کے بعد بدلے سیاسی منظرنامے میں جہاں کئی سیٹوں پر نئے فارمولے ابھرنے لگے ہیں تو کئی پارٹیوں کے سامنے نئے چیلنجز آ کھڑے ہوئے ہیں۔

آجسو نے شروع میں بی جے پی سے 17 سیٹیں مانگی تھیں۔ آجسو لیڈر بھی کہتے ہیں کہ پارٹی نے ان سبھی سیٹوں پو دعویداری کی تھی، جس میں گزشتہ الیکشن میں یا تو پارٹی پہلے مقام پر رہی تھی، یا پھر دوسرے مقام پر۔ اس کے باوجود دونوں کے درمیان اتحاد کو لے کر اتفاق نہیں بن سکا۔

ذرائع کے مطابق بی جے پی قیادت اس الیکشن میں آجسو کو 9 سیٹیں اور اس کے بعد 13 سیٹیں دینے کو رضامند تھی۔ بات نہیں بن پانے کی حالت میں دونوں پارٹیوں کی راہیں جدا ہو گئیں اور دونوں پارٹیوں نے اپنے اپنے امیدواروں کو اس الیکشن میں کئی سیٹوں پر آمنے سامنے اتار دیئے۔ آجسو اب تک 18 امیدواروں کی فہرست جاری کر چکی ہے جس میں 6 ایسی سیٹیں ہیں جہاں بی جے پی کے امیدوار انتخابی میدان میں اپنی قسمت آزما رہے ہیں۔ بی جے پی کے ایک لیڈر کے مطابق آجسو کی اس انتخاب میں امیدیں بڑھ گئی تھیں، جسے پورا کرنا آسان نہیں تھا۔ اس درمیان دیگر پارٹیوں سے ٹکٹ کٹنے سے ناراض لوگوں کی پہلی پسند بھی آجسو بنی جس کا فائدہ آجسو قیادت نے بھرپور طریقے سے اٹھایا۔

چھترپور سے بی جے پی کے سینئر لیڈر رادھا کرشن کشور کو اتار کر بی جے پی کو حیرانی میں ڈال دیا ہے۔ آجسو نے پانچ ایسی سیٹوں پر بھی امیدوار اتار کر بی جے پی کو سیدھے چیلنج دے دیا ہے جو فی الحال بی جے پی کے قبضے میں ہیں۔

غور طلب ہے کہ گزشتہ الیکشن میں آجسو نے آٹھ سیٹوں پر اپنے امیدوار اتارے تھے، جس میں سے پانچ سیٹوں پر اسے کامیابی حاصل ہوئی تھی۔ اس ریزلٹ سے پرجوش اور گزشتہ پانچ سالوں میں ریاستی حالات سے پرجوش آجسو نے انتخابی تیاری کی اور تنظیم کو وسعت دی تھی۔

غور کرنے والی بات یہ ہے کہ بی جے پی سے ٹکٹ ملنے کی آس میں بیٹھے لیڈروں کے ٹکٹ کٹنے کے بعد ان کی پسند آجسو رہی، جس کی وجہ آجسو کے ذریعہ امیدواروں کے اعلان کو تاخیر سے کرنا اور بی جے پی کے ساتھ رہی دوستی کو مانا جا رہا ہے۔ کوڈرما سے بی جے پی ضلع پریشد سربراہ شالنی گپتا آجسو کے ساتھ ہیں جب کہ پاکوڑ سے جے ایم ایم کے سابق رکن اسمبلی عقیل اختر آجسو کے امیدوار ہوں گے۔ ایسے میں کئی سیٹوں پر سیدھی لڑائی سہ رخی بن گئی ہے۔

بہر حال، آجسو کے کارکنان باہر سے آئے امیدواروں کا کتنا ساتھ دیتے ہیں، یہ تو الیکشن کے نتائج آنے کے بعد ہی پتہ چلے گا، لیکن اتنا طے ہے کہ بی جے پی سے دوستی ٹوٹنے کے بعد آجسو نے کئی سیٹوں پر الیکشن ماحول بدل دیا ہے اور جس کا بی جے پی کو زبردست نقصان اٹھانا پڑ سکتا ہے۔

واضح رہے کہ 81 رکنی جھارکھنڈ اسمبلی کے الیکشن کے لیے 30 نومبر سے 20 دسمبر کے درمیان پانچ مراحل میں ووٹنگ ہونی ہے۔ نتائج 23 دسمبر کو برآمد ہوں گے۔