غیر بی جے پی ریاستیں نومنظور شہریت قانون کو مسترد کریں: پرشانت کشور

شہریت ترمیمی بل پارلیمنٹ کے دونوں ایوان سے پاس ہو کر صدر جمہوریہ رام ناتھ کووند کے پاس پہنچا اور ان کے دستخط کے بعد اب یہ بل قانون کی شکل اختیار کر چکا ہے۔ لیکن کئی ریاستوں نے اسے اپنے یہاں نافذ کرنے سے انکار کر دیا ہے۔ اس درمیان بی جے پی کی ساتھی اور بہار حکومت میں شریک جنتا دل یو کے قومی نائب صدر پرشانت کشور عرف پی کے نے کہا ہے کہ اس تقسیم کرنے والے قانون سے ملک کو بچانے کی ذمہ داری اب ملک کے 16 غیر بی جے پی ریاستوں کے وزرائے اعلیٰ پر آ گئی ہے۔

پرشانت کشور اس بل (اب قانون) کے خلاف شروع سے ہی حملہ آور رہے ہیں۔ انھوں نے کئی ٹوئٹ کر کے اس پر جنتا دل یو کی حمایت کی مخالفت کی تھی۔ پرشانت کشور نے اب غیر بی جے پی ریاستوں کے وزرائے اعلیٰ سے اپیل کی ہے کہ پارلیمنٹ میں اکثریت آگے رہی، اب عدلیہ کے علاوہ ملک کی روح بچانے کی ذمہ داری ملک کے 16 غیر بی جے پی ریاستوں کے وزرائے اعلیٰ کے اوپر آ گئی ہے۔ انھوں نے ٹوئٹ میں واضح لفظوں میں لکھا ہے کہ پنجاب، کیرالہ اور بنگال کے وزرائے اعلیٰ نے اس بل کو ’نہ‘ کہہ دیا ہے، اب باقیوں کو بھی اس معاملے میں اپنا رخ واضح کر دینا چاہیے۔

اس سے قبل جمعرات کو بھی پرشانت کشور نے کئی ٹوئٹ کیے تھے جس میں لکھا تھا کہ شہریت ترمیمی بل اور این آر سی کا اقتدار کے ساتھ گٹھ جوڑ خطرناک ہے۔ انھوں نے یہ بھی کہا تھا کہ جنتا دل کو اس کی حمایت کرنے سے پہلے سوچنا چاہیے۔

پرشانت کشور کے ان بیانات سے جنتا دل یو میں پھیلی بے چینی صاف ظاہر ہو رہی ہے۔ بہار حکومت میں وزیر اور جنتا دل یو لیڈر نیرج کمار نے کہا تھا کہ نتیش کمار کو کسی کی نصیحت کی ضرورت نہیں ہے۔ لیکن پرشانت کشور کے علاوہ جنتا دل یو کے قومی ترجمان پون ورما نے بھی ٹوئٹر پر نتیش کمار سے اپیل کی تھی کہ وہ اس بل کی حمایت کرنے کے فیصلے پر ایک بار پھر غور کریں۔ دونوں نے نتیش کمار سے یہ گزارش اس وقت کی تھی جب لوک سبھا میں پارٹی نے بل کی حمایت کی تھی اور راجیہ سبھا میں یہ بل پیش ہونے ہی والا تھا۔