جین-زی مظاہرہ: کئی ٹرینوں کی منسوخی اور میٹرو اسٹیشنز بند رکھنے کے خلاف عرضی پر عدالت عظمیٰ کل کرے گی خصوصی سماعت

سپریم کورٹ اتوار کو حکم عدولی کی ایک عرضی پر خصوصی سماعت کرنے والا ہے۔ یہ عرضی جنتر منتر پر آج ہونے والے جین-زی کے احتجاجی مظاہرہ سے قبل پبلک ٹرانسپورٹ کو پوری طرح بند نہ کرنے سے متعلق عدالت کے 9 اکتوبر والے حکم کو قصداً نظر انداز کرنے کے الزام میں داخل کی گئی ہے۔ جسٹس جوئے مالیا باگچی اور جسٹس وی موہنا کی بنچ 11 اکتوبر کی صبح 10.30 بجے اس معاملہ پر سماعت کرے گی۔ اس عرضی میں مرکزی داخلہ سکریٹری، دہلی پولیس کمشنر اور ڈی ایم آر سی چیئرمین کے خلاف حکم عدولی کی کارروائی کا مطالبہ کیا گیا ہے۔ اس میں الزام عائد کیا گیا ہے کہ 45 میٹرو اسٹیشنوں کے دروازے بند رکھے گئے تھے۔

بالی ووڈ اداکار اور عامر خان کے بھانجے عمران خان کو ممبئی میں مظاہرہ کے دوران پولیس نے حراست میں لے لیا ہے۔ موصولہ اطلاع کے مطابق زین میری اور سماجی کارکن و این سی پی (ایس پی) لیڈر فرقان شیخ کو بھی ممبئی پولیس نے حراست میں لیا ہے۔ حالانکہ مظاہرہ کس معاملہ پر کیا جا رہا تھا اور حراست میں لیے گئے لوگوں کو کہاں لے جایا گیا ہے، اس بارے میں فی الحال کوئی پختہ جانکاری سامنے نہیں آئی ہے۔ عمران خان نے میڈیا کے سامنے اتنا ضرور کہا ہے کہ ’’میں یہاں پر ملک کے لوگوں کی حمایت میں آیا تھا۔ ہر کسی کو اپنی آواز اٹھانی چاہیے۔‘‘

دہلی میں آج صبح سے ہو رہی گرفتاریوں پر سونم وانگچک نے سخت رد عمل ظاہر کیا ہے۔ انھوں نے سوشل میڈیا پر جاری اپنے بیان میں کہا ہے کہ ’’ہندوستان غیر اعلانیہ ایمرجنسی کی حالت میں ہے۔ کل جب میں نے آج کے احتجاجی مظاہرہ میں یکجہتی و امن کی اپیل کرتے ہوئے ایک میسج پوسٹ کیا تھا، تو میں نے کبھی نہیں سوچا تھا کہ دنیا کی سب سے بڑی جمہوریت غیر اعلانیہ ایمرجنسی کی زد میں ہوگی۔‘‘ انھوں نے یہ بھی کہا کہ ’’مجھے خوشی تھی کہ تحریک کی قیادت کرنے کے لیے کئی لیڈران موجود تھے، لیکن اب مجھے پتہ چلا ہے کہ ان سبھی کو گرفتار کر لیا گیا ہے۔ مجھے امید ہے کہ گرفتار کیے گئے لوگوں کو جلد ہی رِہا کر دیا جائے گا۔ اگر کل تک انھیں رِہا نہیں کیا گیا تو مجھے بھوک ہڑتال یا پدیاترا کرنے پر غور کرنا پڑے گا۔‘‘

راجدھانی دہلی میں جین-زی مظاہرین کے خلاف پولیس کی کارروائی اور ٹرینوں و میٹرو اسٹیشنز کو بند کیے جانے پر کانگریس جنرل سکریٹری پرینکا گاندھی نے شدید مذمت کی ہے۔ انھوں نے سوشل میڈیا پر جاری ایک بیان میں کہا ہے کہ ’’ہندوستان اب جمہوری ملک نہیں رہا۔ یہ نریندر مودی اور امت شاہ کے ذریعہ کی جا رہی تاناشاہی ہے۔ جو بھی لوگ جمہوریت کو کمزور کرنے کے لیے ان کے ساتھ ملی بھگت کر رہے ہیں، وہ ملک کے خلاف غداری کر رہے ہیں۔‘‘

دہلی پولیس کسی بھی حال میں جنتر منتر پر مظاہرین کو پہنچنے نہیں دینا چاہتی۔ اس کوشش میں اب تک 3000 سے زیادہ لوگوں کے خلاف کارروائی کی جا چکی ہے۔ سابق وزرائے اعلیٰ ممتا بنرجی، پینارائی وجین اور کیجریوال سمیت کئی سرکردہ سیاسی و سماجی لیڈران پولیس کی حراست میں ہیں۔ ڈیریک او برائن، منیش سسودیا، سنجے سنگھ، ابھجیت دپکے، دھرو راٹھی، نیہا بورا جیسی شخصیات کو بھی پولیس نے حراست میں لے رکھا ہے۔ گیانیش کمار کے استعفیٰ کا مطالبہ کرتے ہوئے جین-زی کا یہ مظاہرہ پولیس کی کارروائی کے درمیان حکومت کے منھ پر زوردار طمانچہ معلوم پڑ رہی ہے۔ سماجی کارکن یوگیندر یادو بھی اس مظاہرہ میں پیش پیش دکھائی دے رہے ہیں۔ وہ لگاتار پولیس کارروائی کی ویڈیوز سوشل میڈیا پلیٹ فارم پر شیئر کر رہے ہیں اور مظاہرہ کو وقت کی ضرورت بتا رہے ہیں۔ ایک تازہ ویڈیو میں انھوں نے لکھا ہے کہ ’’یہ گرفتاریاں تحریک کا خاتمہ نہیں، اقتدار کی بے چینی کا اشارہ ہیں۔‘‘

دہلی پولیس جین-زی کو جنتر منتر پہنچنے سے روک رہی ہے، کیونکہ انھیں وہاں مظاہرہ کرنے کی اجازت نہیں دی گئی ہے۔ حالانکہ ’کاکروچ جنتا پارٹی‘ کے سرکردہ لیڈران ابھجیت دپکے، سورو داس اور آشوتوش رانکا نے ہر حال میں مظاہرہ کا عزم ظاہر کیا تھا، جس کے بعد جین-زی کے ساتھ ساتھ کئی سیاسی و سماجی تنظیموں کے لیڈران و کارکنان سڑک پر نظر آ رہے ہیں۔ ابھیجیت اور سورو کو تو دہلی پولیس نے دہلی ایئرپورٹ پر طیارہ میں ہی گرفتار کر لیا تھا، جس سے نوجوانوں میں یہ اندیشہ پیدا ہوا کہ مظاہرہ کی قیادت کس کے ہاتھوں میں ہوگی۔ اس بارے میں دپکے کی ایک ویڈیو سامنے آئی جس میں کہا گیا کہ ان کی غیر موجودگی میں اجنکیا شندے مظاہرہ کی قیادت کریں گے۔ اب اجنکیا شندے نے ایک ویڈیو بیان جاری کر کہا ہے کہ دہلی پولیس اگر نوجوانوں کو جنتر منتر پہنچنے سے روکتی ہے، تو اس جگہ کو ہی جنتر منتر بنا دیں جہاں انھیں روکا جا رہا ہے۔

دہلی کے سابق وزیر اعلیٰ اور عآپ کنوینر اروند کیجریوال کو بھی دہلی پولیس نے حراست میں لے لیا ہے۔ ان کے ساتھ کچھ دیگر عآپ لیڈران و کارکنان بھی حراست میں لیے گئے ہیں۔ میڈیا رپورٹس کے مطابق اب تک کم و بیش 2000 افراد حراست میں لیے جا چکے ہیں اور انھیں مختلف مقامات پر رکھا گیا ہے۔

ممتا بنرجی ساؤتھ ایونیو بس اسٹینڈ پر دھرنا دے رہی تھیں، تبھی دہلی پولیس نے انھیں حراست میں لے لیا۔ ان کے ساتھ 5 اراکین پارلیمنٹ کو بھی حراست میں لیے جانے کی اطلاع موصول ہو رہی ہے۔ علاوہ ازیں کئی ٹی ایم سی کارکنان بھی حراست میں لیے گئے ہیں۔ میڈیا رپورٹس کے مطابق پولیس نے ممتا بنرجی اور 5 اراکین پارلیمنٹ کو ایک قیدی وین میں بٹھا کر نامعلوم مقام پر لے جا رہی ہے۔

سی جے پی رہنماؤں کے خلاف پولیس کی کارروائی پر این سی پی (ایس پی) کی رہنما سپریا سولے نے کہا کہ ’’طیارہ میں ہی انہیں حراست میں لینا غلط اور غیر آئینی ہے۔‘‘ کاکروچ جنتا پارٹی (سی جے پی) نے ہفتہ کے روز دعویٰ کیا کہ دہلی میں طیارہ کے اترتے ہی دہلی پولیس نے اس کے رہنماؤں ابھیجیت دپکے، سورو داس اور آشوتوش رانکا کو طیارہ کے اندر سے حراست میں لے لیا۔

دہلی میں بی جے پی ہیڈکوارٹر کے قریب آل انڈیا اسٹوڈنٹس ایسوسی ایشن (اے آئی ایس اے) اور بائیں بازو کی جماعتوں کے کارکن احتجاجی مظاہرہ کر رہے ہیں۔

سی جے پی کے بانی ابھیجیت دپکے کی دادی کا آج انتقال ہو گیا۔ ساوتری بائی شنکر دپکے نے 85 سال کی عمر میں آخری سانس لی۔ ابھیجیت دپکے دہلی میں احتجاج کر رہے تھے، اسی دوران ان کی دادی کا انتقال ہو گیا، جس سے خاندان میں غم کی لہر دوڑ گئی۔ دپکے کی دادی کا انتقال ان کے آبائی گاؤں سنتک پمپری، ہنگولی میں ہوا۔

کاکروچ جنتا پارٹی کے بانی ابھیجیت دپکے کو ہفتہ کے روز طیارے میں ہی حراست میں لے لیا گیا۔ دپکے کی والدہ نے پولیس کی اس کارروائی پر ناراضگی ظاہر کی ہے۔ انہوں نے واضح طور پر کہا کہ حکومت نے یہ اچھا نہیں کیا۔ انہوں نے سوال کیا کہ ملک کے لیے کام کرنے والے بچوں کے خلاف ایسی کارروائی کون کرتا ہے؟

سی جے پی کے احتجاج سے قبل دہلی میں عائد سیکورٹی پابندیوں پر سی پی آئی رہنما اینی راجا نے کہا کہ ’’مرکزی حکومت کی جانب سے یہاں تمام سکیورٹی فورسز کو تعینات کرنا انتہائی قابل مذمت قدم ہے۔ اختلاف رائے ظاہر کرنے کا حق بنیادی حق ہے اور جمہوریت کی بنیاد ہے۔ ایس آئی آر ہندوستان کے آئین کے خلاف ہے۔ ہم اس بات کو یقینی بنانے کی کوشش کریں گے کہ آئین محفوظ رہے اور ملک ایک سیکولر اور جمہوری قوم بنا رہے۔‘‘

دہلی کے جنتر منتر پر مجوزہ احتجاج کے درمیان کاکروچ جنتا پارٹی (سی جے پی) نے دعویٰ کیا ہے کہ اس کے بانی ابھیجیت دپکے سمیت 3 رہنماؤں کو دہلی پہنچتے ہی حراست میں لے لیا گیا۔ پارٹی کے مطابق، ابھیجیت دپکے، سورو داس اور آشوتوش رانکا کو ہفتے کے روز طیارے سے دہلی پہنچنے کے بعد دہلی پولیس نے حراست میں لے لیا۔ سی جے پی نے اس کارروائی کی سخت مذمت کرتے ہوئے اسے آمرانہ قدم قرار دیا ہے۔ پارٹی نے الزام عائد کیا ہے کہ دہلی پولیس نے پہلے سے طے شدہ منصوبے کے تحت اس کے رہنماؤں کو ہوائی اڈے پر ہی روک لیا، تاکہ وہ احتجاج کی جگہ تک نہ پہنچ سکیں اور پُرامن مظاہرے کی قیادت نہ کر سکیں۔ پارٹی نے اسے نقل و حرکت کی آزادی کی کھلی خلاف ورزی قرار دیتے ہوئے ابھیجیت دپکے، سورو داس اور آشوتوش رانکا کی فوری اور غیر مشروط رہائی کا مطالبہ کیا ہے۔

دہلی پولیس نے ابھیجیت دپکے، سورو داس اور آشوتوش رانکا کو حراست میں لے لیا ہے۔ اہم بات یہ بھی ہے کہ وہ طیارے سے اتر بھی نہیں پائے تھے کہ پولیس نے انہیں حراست میں لے لیا۔

دہلی میں جنتر منتر پر سی جے پی کو احتجاج کی اجازت نہ ملنے کے باوجود مظاہرین یہاں پہنچ رہے ہیں۔ سی جے پی کے بانی ابھیجیت دپکے بھی دہلی پہنچ گئے ہیں۔ دوسری جانب جنتر منتر پر پولیس کی کارروائی جاری ہے اور تقریباً 150 مظاہرین کو حراست میں لیا گیا ہے۔ دھرو راٹھی بھی حراست میں ہیں اور سی جے پی کی قانونی ٹیم کی سربراہ رتنا کو بھی پولیس نے حراست میں لیا ہے۔