جموں و کشمیر: بی جے پی اراکین ایوان کے وقار کا خیال رکھیں، مجھ پر بھروسہ نہیں تو تحریک عدم اعتماد لائیں: اسپیکر

جموں و کشمیر اسمبلی اسپیکر عبدالرحیم راتھر نے ایوان کے ذریعہ پاس خصوصی درجہ کی قرار داد کو واپس لینے یا عہدہ چھوڑنے کے بی جے پی کے مطالبہ کو خارج کر دیا ہے۔ انہوں نے کہا کہ اگر بی جے پی کو ان پر بھروسہ نہیں ہے تو اسے تحریک عدم اعتماد منظور کرانی چاہیے۔

انہوں نے کہا کہ بی جے پی اراکین کو ایوان کے وقار کا خیال رکھنا چاہیے، انہوں نے اسمبلی سکریٹری میز پر جہاں قومی علامتی نشان ہوتا ہے، پر کھڑے ہوکر اس کی توہین کی ہے۔ یہ ناقابل قبول ہے۔ ہمیں اپنے پرچم اور علامت کا احترام کرنا چاہیے۔ اراکین کو ایوان کے باہر لوگوں کے لیے مثال پیش کرنی چاہیے۔ ان کی ایسی حرکت سے عوام کے درمیان اچھا پیغام نہیں جائے گا۔

قبل ازیں جمعرات کو ایوان کی کارروائی معطل ہونے کے بعد صحافیوں سے بات چیت میں اسپیکر راتھر نے کہا تھا کہ بی جے پی اراکین کو ضابطہ کی جانکاری نہیں ہے، اسپیکر کے پاس قرار داد واپس لینے کا اختیار نہیں ہوتا ہے۔ ایوان کے ذریعہ پاس کسی بھی چیز کو صرف ایوان ہی رد کر سکتا ہے۔ ایسے معاملوں میں اسپیکر کے اختیارات محدود ہی ہوتے ہیں۔

قابل ذکر ہے کہ جموں و کشمیر قانون ساز اسمبلی نے بدھ کو جموں و کشمیر کا خصوصی درجہ بحال کرنے کے لیے ایک قرار داد منظور کیا ہے۔ وادی کی سیاسی پارٹیوں نے اس قرار داد کا استقبال کیا ہے جبکہ اہم اپوزیشن جماعت بی جے پی نے اس کی سخت مخالفت کرتے ہوئے مطالبہ کیا ہے کہ اسپیکر یا تو قرار داد کو واپس لیں یا عہدہ چھوڑ دیں۔