جموں و کشمیر: ملی ٹینٹوں کے ساتھ تصادم میں فوج کے 3 جوان شہید

سری نگر: جموں و کشمیر کے کولگام ضلع میں جمعہ کو ملی ٹینٹوں اور ہندوستانی فوج کے جوانوں کے درمیان تصادم ہوا، جس میں تین فوجی جوان شہید ہو گئے۔ این ڈی ٹی وی کی رپورٹ کے مطابق ایک پولیس اہلکار نے بتایا کہ سیکورٹی فورسز نے ملی ٹینٹوں کی موجودگی کی اطلاع ملنے کے بعد جنوبی کشمیر کے کولگام ضلع کے ہالان جنگلات کے بالائی علاقوں میں محاصرے اور تلاشی کی کارروائی شروع کی۔

انہوں نے کہا کہ ملی ٹینٹوں کی جانب سے سیکورٹی فورسز پر فائرنگ کے بعد تلاشی آپریشن انکاؤنٹر میں بدل گیا۔ اس دوران سکیورٹی فورسز نے جوابی کارروائی کی۔ افسر نے بتایا کہ فائرنگ سے تین سیکورٹی اہلکار زخمی ہوئے اور علاج کے دوران ان کی موت ہو گئی۔ اس سے قبل پولیس نے کہا تھا کہ زخمی فوجی اہلکاروں کو اسپتال لے جایا گیا ہے۔

سری نگر میں مقیم فوج کی چنار کور نے ایک ٹوئٹ میں کہا ’’آپریشن ہالان، کولگام، 4 اگست 2023 کو کولگام میں ہالان کی بلند چوٹیوں پر ملی ٹینٹوں کی موجودگی کے بارے میں مخصوص اطلاع پر سکیورٹی فورسز نے آپریشن شروع کیا تھا۔ ملی ٹینٹوں کے ساتھ فائرنگ کے تبادلے میں تین جوان زخمی اور بعد میں شہید ہو گئے۔ سرچ آپریشن جاری ہے۔

پولیس افسر نے مزید بتایا کہ علاقے میں اضافی فورس بھیج دی گئی ہے اور تلاشی مہم تیز کر دی گئی ہے۔ خیال رہے کہ یہ انکاؤنٹر اور فوجی جوانوں کی شہادت جموں و کشمیر میں دفعہ 370 ہٹائے جانے کی چوتھی برسی کے موقع پر ہوئی ہے۔

اس سے قبل اپریل اور مئی میں پونچھ اور راجوری اضلاع میں دو الگ الگ حملوں کے مقابلوں میں پانچ ایلیٹ کمانڈوز سمیت 10 فوجی اہلکار شہید ہوئے تھے۔ یہ وہ علاقہ ہے جو گزشتہ تقریباً دو دہائیوں سے ملی ٹنسی سے پاک سمجھا جاتا تھا۔ اس سال کے شروع میں بھی ملی ٹینٹوں نے راجوری میں عام شہریوں کو نشانہ بنایا تھا۔ اس دوران 7 بے گناہ افراد ہلاک اور ایک درجن سے زائد زخمی ہوئے تھے۔