جے شنکر ایک ناکام وزیر خارجہ ہیں، جنہوں نے چینی مداخلت پر خاموشی اختیار کر رکھی ہے: کانگریس

نئی دہلی: انڈین نیشنل کانگریس نے وزیر خارجہ ایس جے شنکر کو ایک 'ناکام' وزیر خارجہ قرار دیتے ہوئے الزام عائد کیا کہ چین میں سب سے طویل عرصے تک خدمات انجام دینے والے سفارت کار ہونے کے باوجود وہ تمام محاذوں پر ناکام رہے ہیں۔ ایک پریس کانفرنس سے خطاب کرتے ہوئے پارٹی کی ترجمان سپریہ شرینیت نے کہا کہ چینی مداخلت کے معاملے پر وزیر خارجہ نے خاموشی اختیار کر رکھی ہے اور کہا جب چین نے 2000 مربع کلومیٹر ہندوستانی علاقہ میں دراندازی کی تھی تو کیا انہی کے مشورے پر وزیر اعظم نے کہا تھا کہ ’کوئی نہیں آیا۔‘’

کانگریس لیڈر نے الزام لگایا کہ چین مقبوضہ علاقے میں سڑکیں، ریلوے نیٹ ورک اور پل بنا رہا ہے۔ چین کے ساتھ ہندوستانی تجارت بڑھ رہی ہے اور ایک طرح سے ہندوستان چینی پی ایل اے کو فنڈز فراہم کر رہا ہے، انہوں نے کہا کہ ہر میٹنگ میں پی ایم کی خاموشی کی وجہ سے پی ایل اے کہتی ہے کہ انہوں نے کسی کی سرزمین پر حملہ نہیں کیا۔ شرینیت نے جے شنکر کے اس بیان پر تنقید کی کہ ہندوستان ایک چھوٹی معیشت ہونے کے ناطے بڑی معیشت کا مقابلہ نہیں کرسکتا اور اسے حقارت والا بیان قرار دیا۔

وزیر خارجہ پر ہندوستان کی خارجہ پالیسی میں ناکامی کا الزام لگاتے ہوئے، انہوں نے کہا کہ بائیڈن کی صدر کے طور پر تقریباً نصف مدت کار گزر جانے کے باوجود ہندوستان میں کوئی امریکی سفیر نہیں ہے۔ کانگریس کی ترجمان نے کہا کہ جب حکومت کہہ رہی ہے کہ ہندوستان کے خلاف بین الاقوامی سازش ہو رہی ہے تو جے شنکر اور ان کا محکمہ کیا کر رہا ہے!