مدھیہ پردیش: مسلم ہونے کے شبہ میں جین بزرگ کا پیٹ پیٹ کر قتل

مدھیہ پردیش کے رتلام ضلع میں بزرگ کا پیٹ پیٹ کر قتل کیے جانے کا معاملہ سامنے آیا ہے۔ الزام ہے کہ ضلع کے سب سے بزرگ سرپنچ پستا بائی چتّر کے بڑے بیٹے بھنور لال جین کو مسلمان ہونے کے شبہ میں موت کے گھاٹ اتار دیا گیا۔ خبروں کی مانیں تو پیٹنے والا کوئی اور نہیں، بی جے پی لیڈر ہے۔ بتایا جا رہا ہے کہ سرپنچ کی پوری فیملی 15 مئی کو بھیروجی کی پوجا کرنے چتوڑ گڑھ گیا تھا، 16 مئی کو پوجا کے بعد بھنور لال لاپتہ ہو گئے۔ جمعرات کو ان کی لاش مناسا میں پولیس تھانے سے نصف کلومیٹر دور رامپورہ روڈ پر ملی تھی۔ اب بھنور لال کو پیٹنے کی ویڈیو سامنے آئی ہے۔

میڈیا میں چل رہی خبروں کے مطابق بزرگ کو پیٹنے والے بی جے پی لیڈر کا نام دنیش کشواہا ہے۔ ویڈیو میں وہ بھنور لال سے آدھار کارڈ دکھانے کو کہہ کر بری طرح پیٹتے ہوئے نظر آ رہا ہے۔ دنیش نے نام پتہ پوچھا تو ذہنی طور پر کمزور بھنور لال کے منھ سے محمد نکلا۔ یہ سن کر دنیش ٹوٹ پڑا۔ اس نے آدھار کارڈ مانگا اور بھنور لال کو لگاتار چانٹے مارے۔ پولیس نے مناسا (رتلام) کے دنیش کشواہا پر ایف آئی آر درج کر لی ہے۔

واضح رہے کہ دنیش بی جے پی یوتھ وِنگ میں عہدہ دار رہا ہے۔ اس کی بیوی مناسا میونسپل کارپوریشن میں وارڈ نمبر 3 سے بی جے پی کی کونسلر رہی ہے۔ اس تعلق سے وزیر داخلہ نروتم مشرا کا بیان سامنے آیا تھا کہ مہلوکین کے اہل خانہ سے ان کی بات ہوئی ہے۔ حالانکہ مہلوک کے چھوٹے بھائی راجیش چتّر نے بتایا کہ ان کی وزیر داخلہ سے کوئی بات نہیں ہوئی۔

قابل ذکر ہے کہ سرپنچ پستہ بائی کے فیملی کے سبھی لوگ پورنیما پر راجستھان کے چتوڑ گڑھ قلعہ کے بھیرو پوجن کرنے گئے تھے۔ دوسرے دن 16 مئی کو دوپہر 12 بجے بھنور لال گھر والوں کو بتائے بغیر قلعہ سے نیچے اتر گئے۔ گھر والوں نے کافی تلاش کیا، لیکن جب وہ نہیں ملے تو چتوڑ گڑھ کوتوالی تھانے میں گمشدگی درج کروائی۔ سب نے سوچا کہ وہ بس میں بیٹھ کر اکیلے جاورا آ گئے ہوں گے، اس لیے وہاں بھی تلاش شروع کی، لیکن جمعرات 19 مئی کو دوپہر میں مناسا کے رامپورہ روڈ پر بھنور لال کی لاش ملی۔

پولیس نے اسے اسپتال میں رکھا اور مہلوک کی شناخت کے لیے سوشل میڈیا پر تصویر وائرل کی۔ سرسی میں جیسے ہی چھوٹے بھائی اشوک اور راجیش کو اطلاع ملی، انھوں نے مناسا پہنچ کر لاش کی شناخت کی۔ شناختی کے بعد جمعہ کی صبح پوسٹ مارٹم کر لاش گاؤں لائے اور آخری رسومات ادا کی۔