’میں نے ہی افسر کو فون پر دھمکی دی‘، بی جے پی لیڈر سنگیت سوم کی ویڈیو وائرل

بی جے پی کے سابق رکن اسمبلی سنگیت سوم کی ایک ویڈیو وائرل ہو رہی ہے جس میں وہ کہتے ہوئے دکھائی دے رہے ہیں کہ ’’اگر افسر ٹھیک طرح سے کام نہیں کریں گے، قانون پر عمل نہیں کریں گے تو عوام سے جوتوں سے پٹواؤں گا۔‘‘ انھوں نے مزید کہا کہ ’’کشتریہ سماج کو متحد ہو کر سیاست میں مضبوط پکڑ بنانی ہوگی۔ سماج کی برائیاں آپس میں بیٹھ کر نمٹائیں۔ زمینداری جذبہ چھوڑ کر سماج کے کمزور لوگوں کی مدد میں آگے آئیں۔‘‘

یہ بیان سنگیت سوم نے اتوار کے روز مونڈھاپانڈے کے بھیت کھیڑا گاؤں میں منعقد ’کشتریہ سوابھیمان‘ کے عنوان پر منعقد تقریب سے خطاب کرتے ہوئے دیا۔ اکھل بھارتیہ کشیتریہ مہاسبھا کی طرف سے منعقد اس تقریب میں سنگیت سوم نے اپنے ایک پرانے بیان کو بھی پھر سے دہرایا۔ انھوں نے کہا کہ ’’صحافی دوست مجھ سے پوچھ رہے تھے کہ آپ نے ایک افسر کو دھمکایا تھا۔ آپ کے بیان کی آڈیو خوب وائرل ہو رہی ہے۔ دوسرا لیڈر ہوتا تو کہتا کہ نہیں وہ میری آواز نہیں ہے۔ میں نے کہا کہ ہاں، میں نے دھمکایا۔ اگر افسر ٹھیک طرح سے کام نہیں کریں گے اور قانون پر عمل نہیں کریں گے تو عوام سے ہی جوتوں سے پٹواؤں گا۔‘‘

تقریب کے دوران سنگیت سوم نے کشتریہ سماج سے مخاطب ہوتے ہوئے کہا کہ ’’آپ لوگ کمزوری کی بات مت کریں۔ کمزور مت بنیں۔ کشتریہ سماج کو متحد ہونا ہوگا۔ سماج میں کمزور پکڑ کے سبب سماج کے لوگوں کو پارٹیوں سے ٹکٹ لینے میں جدوجہد کرنی پڑتی ہے۔ تلوار اور بندوق کی لڑائی چھوڑ کر متحد ہو کر سیاسی پکڑ مضبوط بنائیں۔‘‘ ساتھ ہی وہ یہ بھی کہتے ہیں کہ کندرکی اسمبلی حلقہ میں سماج کی طاقت کمزور ہونے کے سبب لوگوں کو پشتہ و سڑکوں کے مطالبہ کو لے کر بھٹکنا پڑ رہا ہے۔