’معصوم فلسطینیوں پر اسرائیلی تشدد، کھلی دہشت گردی‘

دیوبند: دارالعلوم دیوبند کی جانب سے ایک مذمتی بیان جاری کرتے ہوئے کہا ہے کہ مسجد اقصیٰ میں عبادت کرنے والے معصوم فلسطینیوں پر اسرائیل نے جس وحشیانہ تشدد کا مظاہرہ کیا ہے وہ حد درجہ انسانیت سوز اور کھلی دہشت گردی ہے۔ اسرائیلی فوجیوں کے ذریعہ خواتین کی آبرو ریزی، معصوم بچوں کا قتل عام، مسجد اقصیٰ کی بے حرمتی اور اقوام متحدہ کا خاموش رہنا واضح ناانصافی ہے۔ دارالعلوم دیوبند ان تمام انسانیت سوز واقعات کی پر زور مذمت کرتا ہے۔

دارالعلوم کے ذمہ داران کا کہنا ہے کہ دنیا میں حقوق انسانی کا ڈنکا پیٹنے والی نام نہاد تنظیمیں اور با اثر ممالک کی خاموشی حد درجہ باعث تشویش ہے ۔ یہ حقیقت روز روشن کی طرح عیاں ہے کہ اسرائیل کے جارحانہ اقدامات میں روز بروز اضافہ ہو تا جا رہا ہے اور معصوم و نہتے فلسطینی ظلم و تشدد کا شکار بنائے جا رہے ہیں۔ اسرائیلی افواج فلسطینی بستیوں پر بمباری کرنے سے دریغ نہیں کر رہی ہیں۔

مہتمم دارالعلوم نے کہا کہ بے شمار گوشوں سے اسرائیل کی اس دہشتگردانہ کارروائی کے خلاف آوازیں اٹھنے کے باوجود اقوام متحدہ خاموش تماشائی بنا ہوا ہے جبکہ یہی اقوام متحدہ انڈونیشیا اور سوڈان جیسے ممالک میں معمولی سے مطالبہ پر علیٰحدہ ملک بنا دینے کی صلاحیت رکھتا ہے۔ انہوں نے کہا کہ ہم اپنے ملک ہندوستان کی حکومت اور دنیا کے تمام انصاف پسند بالخصوص مسلم ممالک سے مطالبہ کرتے ہیں کہ اسرائیل کی اس وحشیانہ اور دہشتگردانہ کارروائیوں سے معصوم فلسطینیوں کو نجات دلانے کیلئے حق و انصاف اور انسانیت کے نام پر اجتماعی آواز بلند کریں اور اسرائیل کے جبر و تشدد کے صد باب کے لئے مؤثر اقدامات کریں ۔دارالعلوم دیوبند کا کہنا ہے کہ ہمارے ملک کی خارجہ پالیسی ہمیشہ فلسطین کی حامی رہی ہے اس لئے فلسطینی عوام ہندوستان اور اس کے عوام کو اپنا محسن و دوست مانتے ہیں۔

انہوں نے کہا کہ اقوام متحدہ کے اجلاس کے دوران ہندوستان نے ایک مرتبہ پھر فلسطین دوستی کا اظہار کرتے ہوئے اسرائیل کی جارحیت اور اس کے دہشتگردانہ عمل کی سخت مذمت اور فلسطینی قوم سے اظہار یکجہتی کیا ہے۔ اس نے تمام انصاف پسند لوگوں کے دل جیت لئے ہیں۔ مہتمم دارالعلوم نے کہا کہ دارالعلوم دیوبند دنیا کی تمام فلاح انسانی کے لئے کام کرنے والی تنظیموں اور با اثر شہریوں سے بھی مطالبہ کرتا ہے کہ وہ اپنے اپنے ممالک میں سفارت خانوں اور حقوق انسانی کی عالمی تنظیموں کے دفاتر کے سامنے بھی اسرائیل کی ظالمانہ کے خلاف پر امن احتجاج کریں اور ان سربراہان مملکت کو میمورنڈم بھیجیں جو اسرائیل کی سفاکیت پر ابھی تک خاموش ہیں۔