کیا جے اینڈ کے بینک کو پی ایس یو کا درجہ دینا کشمیر کے ساتھ سازش ہے؟

جموں اینڈ کشمیر بینک کے ساتھ پبلک سیکٹر انڈرٹیکنگ یعنی پی ایس یو کی طرح سلوک کیے جانے کو منظوری دیئے جانے کے بعد جموں و کشمیر میں ریاست گرمائی ہوئی ہے۔ اس فیصلے کے خلاف ریاست کی سابق وزیر اعلیٰ محبوبہ مفتی نے سخت رد عمل کا اظہار کیا تھا اور اب انھوں نے ٹوئٹ کرتے ہوئے بتایا ہے کہ اس سلسلے میں ان کی مرکزی وزیر مالیات ارون جیٹلی سے بات ہوئی ہے۔ ٹوئٹ میں انھوں نے کہا ہے کہ ’’جموں اینڈ کشمیر بینک کو پی ایس یو کی طرح استعمال کیے جانے سے متعلق اٹھائے گئے غلط قدم کے بارے میں ارون جیٹلی جی سے بات ہوئی ہے۔ اس فیصلہ نے ریاست کی پریشانیاں بڑھا دی ہیں جو اس کے خصوصی درجہ پر حملہ ہے۔‘‘ انھوں نے مزید کہا کہ ’’وزیر مالیات نے بھروسہ دلایا ہے کہ حکومت اس معاملے پر دوبارہ غور کرے گی۔‘‘

دراصل گزشتہ 22 نومبر کو جموں و کشمیر کے گورنر ستیہ پال ملک کی صدارت میں ہوئی اسٹیٹ ایڈمنسٹریٹو کاؤنسل کی میٹنگ میں جے اینڈ کے بینک کے ساتھ پی ایس یو کی طرح سلوک کیے جانے کو منظوری دے دی گئی۔ اس فیصلہ کے بعد بینک آر ٹی آئی اور سی وی سی کے دائرے میں آ گئی ہے۔ گورنر کے اس قدم کی تنقید کرتے ہوئے محبوبہ مفتی نے پہلے بھی میڈیا سے کہا تھا کہ ’’بینک کو پی ایس یو کے درجہ میں شامل کرنے کے فیصلوں کو بدلا جانا چاہیے کیونکہ یہ ریاست کے خصوصی درجہ کو ختم کرنے کی سازش ہے۔‘‘