کیا ہندوستانی اپنے ہی ملک سے مایوس ہو رہے ہیں؟ بڑی تعداد میں امریکی شہریت اختیار کر رہے ہیں

ہر سال ہندوستان سے لاکھوں لوگ امریکہ جا رہے ہیں۔ ان میں سے اکثر نوکری یا تعلیم کے لیے وہاں جاتے ہیں۔ تاہم، یہ ہندوستانی بعد میں امریکہ میں آباد ہو جاتے ہیں اور امریکی شہریت حاصل کر لیتے ہیں۔ امریکی کانگریس کی تازہ ترین رپورٹ کے مطابق کم از کم 65,960 ہندوستانی سرکاری طور پر امریکی شہری بن چکے ہیں۔ میکسیکو کے بعد بھارت دوسرا ملک ہے جہاں کےسب سے زیادہ لوگ امریکی شہری بن چکے ہیں۔

نیوز پورٹل ’اے بی پی‘ پر شائع رپوٹ کے مطابق امریکی مردم شماری بیورو کے امریکن کمیونٹی سروے کے اعداد و شمار کے مطابق، 2022 میں امریکہ میں 46 ملین غیر ملکی پیدا ہوئے تھے۔ ملک کی آبادی میں ان کا حصہ 14 فیصد ہے۔ ان میں سے 2.45 کروڑ یعنی تقریباً 53 فیصد نے خود کو قدرتی شہری قرار دیا۔ قدرتی شہری وہ ہیں جو امریکہ میں پیدا نہیں ہوئے تھے، لیکن بعد میں انہوں نے امریکی شہریت حاصل کی تھی۔ آپ کو بتاتے چلیں کہ امریکہ کی کل آبادی 33.3 کروڑ ہے۔

خبر رساں ایجنسی پی ٹی آئی کے مطابق 15 اپریل کو جاری ہونے والی تازہ ترین 'یو ایس نیچرلائزیشن پالیسی' رپورٹ میں بتایا گیا کہ آزاد کانگریشنل ریسرچ سروس کے مطابق مالی سال 2022 میں 9,69,380 افراد نیچرلائزڈ امریکی شہری بنے۔ بتایا گیا کہ "جن لوگوں نے قدرتی شہریت اختیار کی ان میں میکسیکو سے تعلق رکھنے والے لوگوں کی تعداد سب سے زیادہ تھی۔ ان کے بعد ہندوستان، فلپائن، کیوبا اور ڈومینیکن ریپبلک کے لوگ تھے۔"

کانگریس کی رپورٹ میں بتایا گیا کہ 2022 میں میکسیکو کے 1,28,878 شہریوں کو امریکی شہریت ملی۔ اس کے بعد 65,960 ہندوستانی امریکی شہری بن گئے۔ فلپائن سے 53,413، کیوبا سے 46,913، ڈومینیکن ریپبلک سے 34,525، ویتنام سے 33,246 اور چین سے 27,038 افراد نے امریکی شہریت حاصل کی۔

رپورٹ میں کہا گیا ہے کہ 2023 میں بیرون ملک پیدا ہونے والے امریکی شہریوں میں سے 16 ملین کا تعلق میکسیکو سے تھا۔ اس کے بعد ہندوستان سے 28 لاکھ لوگ آئے۔ تیسرے نمبر پر 22 لاکھ چینی شہری تھے جو چین میں پیدا ہوئے لیکن امریکی شہری بن گئے۔ امریکہ میں 49 لاکھ لوگ ہیں جو ہندوستانی ہیں یا ان کی جڑیں ہندوستان سے ہیں۔