یوتھ کانگریس کا دفتر ’کمیونٹی کچن‘ میں تبدیل، پرینکا گاندھی نے پیش کیا سلام

ملک اس وقت دوہری مار برداشت کر رہا ہے۔ ایک طرف کورونا کا خوف اور دوسری طرف بھکمری کی صورتحال پیدا ہو چکی ہے۔ ملک کے حالات اس وقت کچھ ایسے ہیں کہ ہزاروں لوگ سڑکوں پر آ گئے ہیں۔ رہنے کے لئے نہ گھر ہے، نہ جیب میں پیسہ ، یہاں تک کہ کھانے کے بھی لالے پڑے ہوئے ہیں۔ سب سے زیادہ پریشان حال وہ یومیہ مزدور ہیں جو مزدوری کر کے گزر بسر کرتے ہیں۔ وہیں، کچھ لوگ ایس بھی ہیں جو ضرورت مند لوگوں کی بے لوس خدمت انجام دے رہے ہیں۔

قومی راجدھانی میں رائسینا روڈ پر واقع انڈین یوتھ نگریس کے صدر دفتر کی ایسی تصاویر منظر عام پر آ رہی ہیں جنہیں دیکھ کر ہر کوئی اس کی ستائش کر رہا ہے۔ دراصل، لاک ڈاؤں کے دوران بے سہارا اور بے گھر لوگوں کو کھانا پیش کرنے کے لئے یوتھ کانگریس نے اپنے صدر دفتر کو کمیونٹی کچن میں تبدیل کر دیا ہے۔ کانگریس پارٹی کی اس یوتھ ونگ نے اپنے دفتر میں ایک خودکار روٹی بنانے والی مشین بھی نصب کی ہے۔ غور طلب ہے کہ یہ مشین ایک گھنٹہ میں 1000 روٹیاں بنا سکتی ہے۔

انڈین یوتھ کانگریس کے صدر سرینواس نے کہا کہ ہم سبھی کو کورونا کی وبا کے خلاف چل رہی جنگ میں اپنا کردار ادا کرنا چاہئے اور جس طرح بھی ہو سکے اپنا تعاون پیش کرنا چاہئے۔ انہوں نے کہا کہ اس وقت قوم کو متحد اور مضبوط رہنے کی ضرورت ہے، کیونکہ ہم متحد رہیں گے تبھی اس وبا سے جیت حاصل کر سکیں گے۔

سرینواس نے کہا ’’یوتھ کانگریس نے اپنے رائسینا روڈ آفس کو نہ صرف کمیونٹی کچن میں تبدیل کیا ہے بلکہ یہاں بے سہارا اور بے گھر لوگوں کو کھانا بھی پیش کیا جائے گا۔ سرینواس نے کہا کہ ہم اپنی پوری کوشش کر رہے ہیں کہ روزانہ ہزاروں افراد کو تازہ کھانا اور پینے کا صاف پانی فراہم کیا جائے۔‘‘

انڈین یوتھ کانگریس کے اس اقدام پر نہ صرف ملک بلکہ پارٹی کی جنرل سکریٹری پرینکا گاندھی نے بھی سلام پیش کیا ہے۔ پرینکا گاندھی نے کہا ہے کہ یوتھ کانگریس نے اپنے دفتر کو کمیونٹی کچن میں تبدیل کیا ہے اور اور ضرورت مند لوگوں کو کھانا مہیا کرنے کے لئے کوشاں ہے۔ آفت کے وقت ایسے بے مثال اقدامات کرنا ملک کی حقیقی خدمت ہے۔ یوتھ کانگریس کے تمام ’سپاہیوں‘ کی یہ کاوش متاثر کن ہے۔ آپ کو سلام!

غورطلب ہے کہ کورونا بحران کے دوران ہزاروں افراد گھر سے بے گھر ہوگئے ہیں۔ نہ تو ان کے پاس کھانے کے لئے کچھ ہے اور نہ ہی رہنے کے لئے گھر۔ ایسی صورتحال میں کانگریس مستقل طور پر اسی طرح مدد کے لئے آگے آ رہی ہے۔ غریبوں کی مدد کے لئے، پرینکا گاندھی اور راہل گاندھی نے بھی امیٹھی میں ضرورت مندوں میں سینی ٹائزر، ماسک سمیت گندم اور چاول تقسیم کیے تھے۔