روس کی کورونا ویکسین کی دس کروڑ خوراک ہندوستان میں تیار ہوں گی

کورونا وبا کےاس دور میں ہندوستان کے لئے ایک اچھی خبر یہ ہے کہ روس میں تیار کورونا وائرس کووڈ19 کی ویکسین ’اسپوتنک وی‘ کی دس کروڑ سے زیادہ خوراک ہندوستان میں تیار کی جائے گی اور اگلے سال جنوری سے اسے تیار کرنا شروع کئے جانے کے امکانات ہیں۔ رشیا ڈائرکٹ انویسٹمنٹ فنڈ (آر ڈی آئی ایف) اور حیدرآباد میں واقع دوا کمپنی ہیراتو بایو فارما کے درمیان اس معاملے میں معاہدہ طے پایا ہے۔

ہیروتو کے ڈائرکٹر بی مرلی کرشن ریڈی نے جمعہ کو بتایا کہ ’’ہمیں کووڈ۔19 کے علاج کے لئے کافی عرصے سے منتظر اسپوتنک وی ویکسین تیار کرنے کے لئےآر ڈی ایف آئی کے ساتھ شراکت داری کرنے پر خوشی ہے۔ ہم ویکسین کے ہندوستان میں جاری کلینیکل ٹسٹ کے نتائج کا انتظار کررہے ہیں اور ہمارا ماننا ہے کہ مقامی سطح پر ویکسین کو تیار کرنے سے مریضوں تک اس کی پہنچ آسان ہوگی۔‘‘

واضح رہے کہ آر ڈی آئی ایف نے روس میں اسپوتنک وی ویکسین کے تیسرے مرحلے کے انسانی ٹسٹ کے نتائج 24 نومبر کو اعلان کئے گئے تھے۔ یہ ٹسسٹ 40,000 رضاکاروں پر کیا گیا اور ویکسین کے نتائج مثبت رہے۔ ہندوستان میں اسپوتنک وی کے دوسرے اور تیسرے مرحلے کا انسانی ٹسٹ کیا جارہا ہے۔

اس کے علاوہ وینزوئیلا، بیلاروس اور متحدہ عرب امارات میں اس ویکسین کے لئے تیسرے مرحلے کا انسانی ٹسٹ ہورہاہے۔تیسرے مرحلہ کے ٹیسٹ کے مثبت نتائج برامد ہونے کے بعد ہی اس کی تیاری کا عمل شروع ہوگا۔ ویکسین کے تعلق سے روس کی اس کمپنی سے بہت امیدیں وابسطہ ہیں ۔