پاکستان برائے کرم کرتار پور گرودوارہ جانے والوں سے 20 ڈالر فیس نہ لے: ہندوستان

نئی دہلی: ہندستان نے پاکستان کےساتھ کرتارپور گلیارہ کھولنے کے لیے معاہدے پر دستخط کرنے کی رضامندی ظاہر کرتے ہوئے پیر کے روز اس سے ایک بار پھر اپیل کی ہے کہ وہ ہر مسافر سے 20ڈالر کی فیس لینے کے اپنے فیصلہ پر ازسرنوغورکرے ۔

وزارت خارجہ نے یہاں جاری ایک بیان میں کہا،’’ حکومت پاکستان سے مسلسل اپیل کرتی رہی ہے کہ عقیدت مندوں کے جذبات کا خیال رکھتے ہوئے اسے کوئی فیس نہیں لینی چاہیے ۔حکومت نے آج پاکستان کو بتایاکہ وہ 23 اکتوبر کو کرتارپور صاحب گلیارہ سے متعلق معاہدے پر دستخط کرنے کوتیار ہے۔‘‘

بیان میں کہاگیاہے کہ معاہدے پر دستخط کےلیے رضامندی ظاہر کرنے کے ساتھ ہی حکومت ایک بار پھر پاکستان سے اپیل کرتی ہے کہ وہ مسافروں سے فیس لینے کے فیصلہ پر ازسرنوغورکرے ۔ہندستان نے کہاکہ اگر پاکستان راضی ہوجائے تو وہ معاہدے کے مسودہ میں کسی بھی وقت تبدیلی کرنے کو تیار ہے۔

بارہ نومبر 2019کو گرونانک دیو کے 550ویں پرکاش پرو سے پہلے ہی اس گلیارے کو کھولا جانا ہے۔ابھی تک طے شدہ پروگرام کے مطابق 8نومبر کو وزیراعظم نریندرمودی ہندستان کی طرف سے مسافروں کی سہولیات کا افتتاح کریں گے۔