دہلی میں صوتی آلودگی پر جرمانہ میں اضافہ، ایک لاکھ تک وصول کرنے کے احکامات

نئی دہلی: دہلی پالیوشن کٹرول کمیٹی (ڈی پی سی سی) راجدھانی میں پھیل رہی آلودگی کے حوالہ سے سخت اقدامات اٹھا رہی ہے۔ اسی ضمن میں ہفتہ کے روز صوتی آلودگی پھیلانے والوں پر عائد ہونے والے جرمانہ میں اضافہ کرنے کا اعلان کیا گیا ہے۔ نئے احکامات کے مطابق صوت آلوگی پھیلانے والوں کو ایک ہزار سے ایک لاکھ تک کا جرمانہ ادا کرنا پڑ سکتا ہے۔

نئے اصولوں کے مطابق مقررہ وقت کے بعد کسی بھی شخص کے رہائشی اور صنعتی علاقہ میں پٹاخہ چلانے پر بالترتیب ایک ہزار اور تین ہزار روپے کا جرمانہ عائد کیا جائے گا۔ اس کے علاوہ اگر کسی ریلی، شادی یا مذہبی تقریب میں پٹاخہ اصولوں کی خلاف ورزی کی جاتی ہے تو منتظمین کو رہائشی اور صنعتی علاقوں میں دس ہزار روپے اور سائلنٹ زون میں خلاف ورزی کرنے پر 20 ہزار روپے تک کا جرمانہ عائد کیا جا سکتا ہے۔

اگر ایک ہی علاقہ میں دوسری مرتبہ اصولوں کی خلاف ورزی کی جاتی ہے تو جرمانہ کی رقم بڑھا کر 40 ہزار روپے کر دی جائے گی اور اگر دو مرتبہ سے زیادہ اصولوں کی خلاف ورزی کی جاتی ہے تو یہ ایک لاکھ روپے تک جرمانہ وصول کیا جائے گا اور اس کے علاوہ ترمیم شدہ اصولوں کے مطابق اس جگہ کو سیل کر دیا جائے گا۔

اس کے علاوہ ڈی پی سی سی نے جنریٹر سیٹوں کی وجہ سے ہونے والے صوتی آلودگی کے مسئلہ سے نمٹنے کے لئے بھی اقدامات اٹھائے ہیں۔ صوتی آلودگی پھیلانے والے آلات کو بھی ضبط کرنے کا التزام کیا گیا ہے۔ ان تجاویز کو نیشنل گرین ٹریبیونل نے قبول کر لیا ہے۔ محکمات کو ترمیم شدہ اصولوں کی سختی سے پاسداری کرنے اور اس پر ہر مہینے رپورٹ پیش کرنے کا حکم دیا گیا ہے۔