دِہاڑی مزدور کو انکم ٹیکس محکمہ نے بھیجا 70 لاکھ روپے کا نوٹس، تحریری شکایت کے بعد پولیس تفتیش شروع
دِہاڑی مزدور سنیل کمار کا کہنا ہے کہ وہ بے حد غریب ہے اور اس کے نام پر کوئی بھی فرم نہیں ہے، کسی نے اس کے پین کارڈ کا غلط استعمال کیا ہے۔
![انکم ٹیکس / یو این آئی](https://media.assettype.com/qaumiawaz%2F2022-01%2F5f62c25c-0dc6-4576-a6ba-22a9d6c358ea%2Fincome_tax.jpg?rect=0%2C0%2C299%2C168&auto=format%2Ccompress&fmt=webp)
ایک دِہاڑی مزدور کو انکم ٹیکس محکمہ نے 70 لاکھ روپے کا نوٹس بھیج دیا ہے جسے دیکھ کر وہ حیران و پریشان ہو گیا۔ واقعہ اتراکھنڈ واقع روڑکی کا ہے جہاں سنیل کمار نامی دِہاڑی مزدور کے نام انکم ٹیکس محکمہ نے نوٹس جاری کیا ہے۔ محکمہ کا کہنا ہے کہ سنیل کمار کے نام پر دہلی میں ایک فرم چلائی جا رہی ہے جس میں کچھ کمپنیوں کے ساتھ لاکھوں روپے کا لین دین ہو رہا ہے۔ انکم ٹیکس جمع نہ کرانے پر یہ نوٹس جاری کیا گیا ہے۔ حالانکہ متاثرہ سنیل کمار کا کہنا ہے کہ وہ کسی بھی فرم یا کمپنی کا مالک نہیں ہے۔
میڈیا رپورٹس کے مطابق 70 لاکھ روپے کا نوٹس موصول ہونے کے بعد گنگ نہر کوتوالی علاقہ کے کرشنا نگر، گلی نمبر 21 باشندہ سنیل کمار نے پولیس میں تحریری شکایت دے دی ہے۔ اس معاملے میں پولیس نے تحقیقات بھی شروع کر دی ہے۔ سنیل کمار کا کہنا ہے کہ وہ مزدوری کر کے بڑی مشکل سے اپنے کنبہ کی پرورش کرتا ہے۔
سنیل کمار کو اتر پردیش کے شاملی واقع انکم ٹیکس محکمہ نے 70 لاکھ روپے ادا کرنے کا نوٹس جاری کیا ہے۔ نوٹس ملنے کے بعد سے ہی سنیل کافی پریشان ہیں۔ انکم ٹیکس وکیل وکاس کمار سینی کے ذریعہ سے سنیل نے انکم ٹیکس محکمہ شاملی کے انکم ٹیکس افسر ابھشیک کمار جین سے رابطہ کیا۔ انھوں نے بتایا کہ اس کے نام پر میسرس ایس جی این براس، دہلی نام سے ایک فرم رجسٹرڈ ہے۔ اس میں سنیل کا پین کارڈ استعمال کیا گیا ہے۔ اسی کے نام پر جی ایس ٹی نمبر بھی لیا گیا ہے۔ اس کی فرم کا دیگر فرم کے ساتھ لاکھوں روپے کا لین دین ہے۔
اس پورے معاملے میں سنیل کمار کا کہنا ہے کہ وہ بے حد غریب ہے اور اس کے نام پر کوئی بھی فرم نہیں ہے۔ کسی نے اس کے پین کارڈ کا غلط استعمال کیا ہے۔ متاثرہ نے اس تعلق سے تحریری شکایت گنگ نہر کوتوالی پولیس کو دی ہے۔ پولیس نے معاملے کی جانچ شروع کر دی ہے۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔