محکمہ انکم ٹیکس کی مایاوتی کے بھائی پر کارروائی، 400 کروڑ کی ملکیت ضبط

لکھنؤ: محکمہ انکم ٹیکس نے بہوجن سماج پارٹی (بی ایس پی) سپریمو مایاوتی کے بھائی کی 400 کروڑ سے زیادہ کی مبینہ بے نامی ملکیت ضبط کی ہے۔

باوثوق ذرائع کے مطابق محکمہ انکم ٹیکس کی جانب سے ضبط کی گئی مبینہ ملکیت بی ایس پی سپریمو مایاوتی کے بھائی آنند کمار اور ان کی بیوی وچترا لتا کی ہے۔ ملحوظ رہے کہ حال ہی میں آنند کمار کو بی ایس پی کا نائب صدر دوبارہ منتخب کیا گیا تھا۔ زمین کو ضبط کرنے کا فیصلہ دو دن قبل کیا گیا تھا۔

ذرائع کے مطابق مبینہ طور پر کمپنی بنا کر بے نامی ملکیت پر قبضہ کرنے والے آنند محکمہ انکم ٹیکس کے نشانے پر تھے۔ اب انفورسمنٹ ڈائریکٹیوریٹ بھی آنند کمار کی مملکیت کے بارے میں جانچ کر رہی تھی۔

گذشتہ سال دہلی کے کاروباری ایس کے جین کی بھی سی بی آئی نے بے نامی ملکیت کے معاملے میں جانچ کی تھی ۔ جین کے بارے میں کہا جاتا ہے کہ انہوں نے آنند کمار کی بے نامی ملکیت پر قبضے میں اہم رول ادا کیا ہے۔

ذرائع کے مطابق آنند کمار نے سال 2007 تا 2012 کے درمیان بے نامی ملکیت بنائی تھی۔ یہ وہی دور ہے جب مایاوتی ریاست کی وزیر اعلی تھیں۔ ایک رپورٹ کے مطابق سال 2007 سے 2012 کے درمیان آنند کمار کی نیٹورتھ 7.5 کروڑ روپئے سے بڑھ کر 1316 کروڑ روپئے تک پہنچ گئی تھی۔