لوک سبھا انتخاب کی تیاریوں کے پیش نظر دہلی کانگریس صدر اروندر سنگھ لولی کی صدارت میں ہوئی میٹنگ

نئی دہلی: آئندہ لوک سبھا انتخابات کی تیاریوں کے سلسلے میں کانگریس پارٹی سرگرم دکھائی دے رہی ہے۔ آج اسی سلسلے میں دہلی کانگریس صدر اروندر سنگھ لولی کی صدارت میں لوک سبھا انتخاب کے ممکنہ امیدواروں کے سلیکشن کا عمل تیز کرتے ہوئے ریاستی دفتر میں دہلی کی اسکریننگ کمیٹی کی ایک میٹنگ ہوئی۔ میٹنگ میں اسکریننگ کمیٹی کی صدر رکن پارلیمنٹ رجنی پاٹل کے علاوہ دونوں رکن سردار پرگٹ سنگھ اور کرشنا الاورو موجود تھے۔ میٹنگ میں پارٹی کے سبھی سینئر لیڈران، سابق اراکین پارلیمنٹ، سابق وزرا، سابق اراکین اسمبلی وغیرہ نے بھی شرکت کی۔

اس موقع پر اروندر سنگھ لولی نے کہا کہ کانگریس پارٹی بوتھ سطح تک اپنی تنظیم کو نہ صرف مضبوط کر رہی ہے بلکہ تنظیم نے تقرریاں بھی شروع کی ہے۔ اسی ضمن میں دہلی مہیلا کانگریس صدر کی تقرری بھی ہوئی۔ انھوں نے کہا کہ پارٹی نوجوانوں، خواتین و سبھی طبقات کے لوگوں کو جوڑنے کے لیے وسیع مہم چلا رہی ہے۔ کانگریس صدر نے سبھی سے اپیل کی کہ وہ اپنے اپنے علاقوں میں دن رات پارٹی کو مضبوط کرنے کے لیے کام کریں۔

اروندر سنگھ لولی نے اپنی تقریر کے دوران بی جے پی کو شکست دینے کا عزم ظاہر کیا۔ انھوں نے کہا کہ لوک سبھا انتخاب میں بی جے پی کو ہرانا ہی ہمارا مقصد ہے، کیونکہ ہم ملک اور آئین کو بچانے کی لڑائی لڑ رہے ہیں۔ اروندر لولی نے مزید کہا کہ دہلی میں اتحاد ہونے کی صورت میں پارٹی اتحاد کے فرائض نبھائے گی، لیکن دہلی کانگریس اپنے سلیکشن کے عمل کو جاری رکھے گی۔

ریاست کے انچارج جنرل سکریٹری دیپک بابریا نے بھی اس موقع پر سبھی کو خطاب کیا۔ انھوں نے کہا کہ کانگریس پارٹی انڈیا اتحاد کو مضبوط کرنے کی سمت میں کام کر رہی ہے۔ دہلی میں بھی اتحاد پر مثبت بات چیت جاری ہے، لیکن پارٹی نے فیصلہ کیا ہے کہ موجودہ حالات کو دیکھتے ہوئے اتحاد ہونے یا نہ ہونے دونوں حالات میں پارٹی لوک سبھا انتخاب کے لیے پوری مضبوطی کے ساتھ تیار ہے۔ اس کے پیش نظر دیپک بابریا نے سبھی سے گزارش کی کہ وہ عوام سے براہ راست رابطہ کریں اور پارٹی کی پالیسیوں کی تشہیر کے علاوہ دہلی میں کانگریس حکومت کے دوران ہوئی شاندار اور ہمہ جہت ترقی کی یاد دلائیں۔

کانگریس کے سینئر لیڈر مکیش شرما نے میٹنگ کے دوران بتایا کہ دوپہر 12 بجے سے دیر شام تک رجنی پاٹل اور دونوں اسکریننگ کمیٹی اراکین نے کانگریس کے ممکنہ امیدواروں و دہلی میں پارٹی کے حالت کو لے کر سب سے الگ الگ ملاقات کر کے ان کی رائے جانی ہے۔ اس کے علاوہ انھوں نے دہلی کے سبھی ضلعی صدور سے ملاقات کر کے بھی ان کی رائے لی۔ مکیش شرما نے کہا کہ پارٹی نے کانگریس کارکنان و عوام سے بھی مشورے مانگے ہیں اور سب کو ایک ساتھ شامل کر کے پارٹی مضبوط امیدواروں کا انتخاب جلد از جلد کرنا چاہتی ہے۔