اتر پردیش میں کانگریس نے ’تربیت سے طاقت‘ مہم کے دوسرے مرحلہ کا کیا آغاز

لکھنؤ: اترپردیش اسمبلی انتخابات سے پہلے تنظیمی ڈھانچے کو مضبوطی فراہم کر رہی کانگریس کے تربیت سے طاقت مہم کا دوسرا مرحلہ بدھ سے شروع ہوگیا۔ پارٹی کے ریاستی ترجمان انشو اوستھی نے بتایا کہ کانگریس جنرل سکریٹری پرینکا گاندھی واڈرہ کی ہدایت پر ٹریننگ سے طاقت مہم کے دوسرے مرحلے میں ریاست میں 200 سے زیادہ ٹریننگ کیمپ لگا کر 30 ہزار سے زیادہ کارکنوں اور عہدیداروں کو ٹریننگ دی جائے گی۔

اوستھی نے بتایا کہ پارٹی نے گزشتہ جولائی سے ایک خصوصی ٹریننگ ٹاسک فورس کی تشکیل کی ہے جو لگاتار ٹریننگ کے کام کو انجام دے رہی ہے۔ ٹریننگ سے طاقت مہم کے پہلے مرحلے میں کانگریس نے اپنے تقریباً 25 ہزار کارکنوں کو ٹریننگ دی تھی۔11 دنوں تک ضلعی سطح پر چلی اس مہم کے پہلے مرحلے میں چالیس رکنی سات ماسٹر ٹرینر ٹیموں نے یوپی کے سبھی اضلاع میں ضلع اور شہر کمیٹیوں کے عہدیداروں کے ساتھ بلاک صدور، وارڈ صدور اور نیا ئے پنچایت صدور کو ٹریننگ دی تھی۔ اب یہ مہم اسمبلی حلقے کے تحت شروع ہو رہی ہے۔ قابل ذکر ہے کہ اس مہم کے تحت کانگریس نے 700 ٹریننگ کیمپوں کے ذریعہ 2 لاکھ عہدیداروں کو ٹریننگ دینے کی مہم شروع کی گئی ہے۔ یہ مہم چار مرحلوں میں پائے تکمیل کو پہنچے گی۔