چین کے خلاف غصہ‘زومیٹو‘ کے ملازمین کا احتجاج، ٹی شرٹ جلاکر نوکری چھوڑی

فوڈ سپلائی کرنے والی کمپنی ’زومیٹو‘ کے ملازمین کے ایک گروپ نے ہند۔چین سرحد پر چینی افواج کے حملے میں 20 جوانوں کی شہادت پر احتجاج کرتے ہوئے آفیشیل ٹی شرٹ کو جلا دیا ہے اور کمپنی کی نوکری چھوڑ دی ہے۔

جنوبی کولکاتا کے بے ہالا میں احتجاج کرتے ہوئے کچھ لوگوں نے دعویٰ کیا کہ انہوں نے زومیٹو کی نوکری چھوڑ دی ہے اور شہریوں سے اپیل کی ہے کہ ’زومیوٹو‘ میں چینی سرمایہ کاروں کا روپیہ لگا ہوا ہے اس لئے اس کمپنی کے ذریعہ کھانا نہ منگوائیں۔

2018 میں چینی کمپنی ’علی بابا‘ نے زومیوٹو میں 210 ملین ڈالر کی سرمایہ کاری کی تھی۔اس وقت علی بابا کے پاس 14.7 فیصد اسٹاک ہے۔ اس وقت فوڈ ڈلیوری انڈسٹری 150 ملین سالانہ کا بزنس کرتی ہے۔

ایک احتجاج کرنے والے نے بتایا کہ ایک طرف چینی کمپنیاں ہندوستان سے روپے کماتی ہیں اور دوسری طرف ہماری افواج پر حملہ کرتی ہیں۔ چینی افواج ہندوستانی سرزمین پرقبضہ کرنا چاہتی ہے اور ہم اس کو برداشت نہیں کرسکتے ہیں۔ ایک دوسرے مظاہرین نے کہا کہ ہم بھوکا رہنا پسند کریں گے مگر جس کمپنی میں چینی کمپنی نے سرمایہ کررکھی ہے اس میں کام نہیں کریں گے۔

مئی میں زومیوٹو نے اپنے 250 ملازمین کو نوکری سے ہٹادیا تھا۔ کمپنی نے کہا تھا کہ لاک ڈاؤن کی وجہ سے ملک بھر میں ریسٹورنٹ بند ہیں۔ اس نئی پیش رفت پر زومیوٹو کی طرف سے کوئی جواب نہیں آیا ہے۔