’مودی کے ہندوستان میں مسلمانوں کونہیں ملتا انصاف‘، دھرم سنگھ بن چکےاختر کا الزام

بیٹے کے قاتلوں کو سزا نہیں ملنے اور پولس کے ذریعہ قتل معاملے کی غیر جانبدارانہ جانچ نہ کرائے جانے سے مایوس اختر علی نے گزشتہ دنوں مذہب اسلام ترک کرتے ہوئے ہندو مذہب اختیار کر لیا اور اب یہ امید لگائے ہوئے ہیں کہ یوگی حکومت انھیں انصاف دلائے گی۔ اتر پردیش کے باغپت میں اختر علی نے اپنے دیگر 12 اہل خانہ کے ساتھ ہندو مذہب اختیار کیا اور اس کے لیے ’ہندو یوا واہنی‘ کی نگرانی میں باضابطہ ہَون کا اہتمام کیا گیا تھا۔ سبھی 13 لوگوں کو پوجا پاٹھ کے دوران باضابطہ ہندو مذہب میں شامل کیا گیا۔

دھرم سنگھ نے میڈیا سے بات کرتے ہوئے اپنے مذہب تبدیل کرنے کے اسباب کا تذکرہ کرتے ہوئے بتایا کہ ’’پی ایم مودی کے ہندوستان میں مسلمانوں کو ایک نظر سے نہیں دیکھا جا رہا ہے۔ مجھے انصاف چاہیے اور اسی لیے میں نے ہندو مذہب اختیار کیا۔‘‘ دھرم سنگھ کی فیملی کا کہنا ہے کہ اب انھیں یوگی حکومت سے انصاف کی امید ہے اور ہم چاہتے ہیں کہ ضرورت پڑنے پر قتل واقعہ کی جانچ سی بی آئی سی بھی کرائی جائے۔ ہندو مذہب اختیار کرنے والوں کا کہنا ہے کہ اسلام مذہب میں رہ کر قاتلوں کو سزا نہیں مل سکتی کیونکہ مسلم دبنگوں نے ہی قتل کا واقعہ انجام دیا ہے اور مسلم سماج بھی ہمارے ساتھ کھڑا نہیں ہے۔

مذہب بدل کر دھرم سنگھ بن چکے علی اختر نے اپنے پورے گھر والوں کے ساتھ مذہب تبدیل کرنے کا حلف نامہ ایس ڈی ایم کو سونپ دیا ہے اور ضلع مجسٹریٹ نے اس کی تصدیق بھی کر دی ہے۔ اس دوران بھی دھرم سنگھ نے میڈیا سے بات چیت کرتے ہوئے یہ بات کہی تھی کہ مودی جی کے ہندوستان میں مسلمانوں کے ساتھ مناسب سلوک نہیں ہوتا اور مجھے انصاف چاہیے۔

واضح رہے کہ جس طرح علی اختر نے اپنا نام دھرم سنگھ رکھ لیا ہے اسی طرح ان کے بیٹوں دلشاد نے اپنا نام دلیر سنگھ، نوشاد نے نریندر اور ارشاد نے کوی رکھ لیا ہے۔ تینوں کی بیویاں، دو پوتے اور چار پوتیاں بھی ہندو مذہب اختیار کرنے والوں میں شامل ہیں۔